திருச்சி: ஸ்ரீரங்கம் அருள்மிகு அரங்கநாதர் கோயிலில் சகஸ்ரதீப வைபவம் இன்று தொடங்கி 3 நாட்கள் நடக்கவுள்ளது. வைணவக் கோயில்களில் கார்த்திகை மாதத்தில் ஆயிரக்கணக்கான விளக்குகள் ஏற்றி வழிபடுதல் மிகுந்த நற்பலன்களைக் கொடுக்கும். இவ்வகையில் ஸ்ரீரங்கம் ரங்கநாதர் கோயிலில்  ஆண்டுதோறும் 3 நாட்களுக்கு ஸஹஸ்ரதீபம் ஏற்றி சிறப்பு வழிபாடு நடக்கிறது. அதே போல இந்த ஆண்டும் ஸஹஸ்ரதீப வைபவம் இன்று முதல் 3 நாட்கள் நடைபெற உள்ளது. முதல் நாளான இன்று (9ம்) தேதி மாலை 6 மணியளவில் ஸ்ரீரங்கம் கோயில் ரெங்கநாயகி தாயார் சன்னதியிலும், நாளை (10-ம்) தேதி சக்ரத்தாழ்வார் சன்னதியிலும், நாளை மறுநாள் (11-ம் தேதி) மாலை பெரிய சன்னதி எனப்படும் ரங்கநாதர் சன்னதியின் மூன்றாம் பிரகாரத்திலும் ஸஹஸ்ர தீபம் ஏற்றப்படுகிறது.  ஏற்பாடுகளை கோயில் நிர்வாகமும், பட்டாசாரியார்களும் செய்துள்ளனர்.