திருக்கோவிலூர்: திருக்கோவிலூர் உலகளந்த பெருமாள் கோவில், வீரட்டானேஸ்வரர் கோவில்களில் தமிழ் வருட பிறப்பை முன்னிட்டு சிறப்பு வழிபாடு நடந்தது.

திருக்கோவிலூர் உலகளந்த பெருமாள் கோவிலில் தமிழ் வருடப்பிறப்பை முன்னிட்டு அதிகாலை 4:30 மணிக்கு விஸ்வரூப தரிசனம், பொது சேவை, 11:00 மணிக்கு ஸ்ரீதேவி பூதேவி சமேத தேகளீச பெருமாளுக்கு சிறப்பு திருமஞ்சனம், அலங்காரம், தீபாராதனை, பிரசாதம் விநியோகம் செய்யப்பட்டது. மாலை 5:00 மணிக்கு மூலஸ்தானத்தில் பஞ்சாங்கம் வாசித்தலும், தொடர்ந்து 6:00 மணிக்கு தேகளீச பெருமாள் கருடவாகனத்தில் எழுந்தருளி வீதி புறப்பாடு நடந்தது. ஜீயர் ஸ்ரீதேகளீச ராமானுஜாசாரிய சுவாமிகள் தலைமையில் நடந்த விழாவில் ஏராளமான பக்தர்கள் நீண்ட வரிசையில் வெகு நேரம் காத்திருந்து சுவாமியை வழிபட்டுச் சென்றனர். வீரட்டானேஸ்வரர் கோவிலில் காலை 6:30 மணிக்கு மூலமூர்த்திகளுக்கு அபிஷேகம், மூலவர் வீரட்டானேஸ்வரருக்கு சிறப்பு அலங்காரம், மகா தீபாராதனை நடந்தது. இதில் ஏராளமான பக்தர்கள் கலந்து கொண்டு சுவாமியை வழிபட்டனர்.

திருக்கோவிலூர் கலை அறிவியல் கல்லூரி வளாகத்தில் உள்ள வித்தியா செல்வ கணபதி ஆலயத்தில் காலை 9:00 மணிக்கு அபிஷேகம், அலங்காரம், தீபாராதனை நடந்தது. கல்லூரி தலைவர் செல்வராஜ், பொருளாளர் ஏழுமலை மற்றும் கல்லூரி ஊழியர்கள் பலரும் கலந்து கொண்டனர். பக்தர்களுக்கு பிரசாதம் விநியோகிக்கப்பட்டது.