ஆர்.எஸ்.மங்கலம்: ஆர்.எஸ்.மங்கலம் அருகே ஆடி கடைசி வெள்ளியை முன்னிட்டு நடைபெற்ற மாடக்கோட்டை முனீஸ்வரர் கோயில் விழாவில், 10 ஆயிரம் பேருக்கு அசைவ விருந்து அன்னதானம் நடைபெற்றது.

ஆர்.எஸ்.மங்கலம் அருகே மாடக்கோட்டையில் பிரசித்தி பெற்ற தர்ம முனீஸ்வரர் கோயில் உள்ளது. இந்தக் கோயிலில் ஆடி மாதத்தில் ஆடி பூஜை விழாவை முன்னிட்டு வருடம் தோறும் விழா எடுக்கப்பட்டு வருகிறது. இந்த நிலையில், கோயிலில் இன்று ஆடி பூஜை விழா மற்றும் ஆடி கடைசி வெள்ளி விழா நடைபெற்றது. முன்னதாக விழாவை முன்னிட்டு மூலவருக்கு சிறப்பு அபிஷேக ஆராதனைகள் செய்யப்பட்டு, தீப ஆராதனை காண்பிக்கப்பட்டன. இதில் ஏராளமான பக்தர்கள் கலந்து கொண்டு தரிசனம் செய்தனர். தொடர்ந்து, 500 க்கும் மேற்பட்ட கிடாய்கள் வெட்டப்பட்டு, பத்தாயிரம் பேருக்கு அசைவ விருந்து அன்னதானம் நடைபெற்றது. ஏற்பாடுகளை கோயில் நிர்வாகிகள் டிரஸ்டி கருப்பதேவர், தனசேகரன் உள்ளிட்டோர் செய்திருந்தனர். சுற்றுப்புறத்தில் உள்ள நூற்றுக்கும் மேற்பட்ட கிராமத்தினர் அன்னதானத்தில் கலந்து கொண்டனர்.