மேட்டூர்: காவிரி ஆற்றில், விநாயகர் சிலைகள் கரைக்கப்படுவதால், தீயணைப்பு வீரர்கள், போலீசார் பாதுகாப்பு பணியில் ஈடுபட்டுள்ளனர். நாடு முழுவதும், நேற்று விநாயகர் சதுர்த்தி விழா கொண்டாட்டப்பட்டது. அதேசமயம் சிலை கரைக்கப்படுவதும் தொடங்கியது. சேலம் மாவட்டத்தில் காவிரி ஆற்று பகுதிகளான மேட்டூர் பழைய காவிரி பாலம், எம்.ஜி.ஆர்.பாலம், பூலாம்பட்டி ரோடு, சங்கிலி முனியப்பன் கோவில் அருகே சிலைகளை கரைக்க, மக்கள் மற்றும் பல்வேறு அமைப்பினர், வாகனங்களில் கொண்டு வந்து கரைத்தனர். மேட்டூர் டி.எஸ்,பி., மரியமுத்து தலைமையில், கருமலைக்கூடல், கொளத்துார், மேச்சேரி உள்ளிட்ட பகுதிகளில் முதல் நாளான நேற்று, 150 போலீசார் பாதுகாப்பு பணியில் ஈடுபட்டனர். தவிர, மேட்டூர் தீயணைப்பு நிலைய அலுவலர் வெங்கடேஷ் தலைமையில், 15 வீரர்கள், பொதுப்பணித்துறை, மீன்வளத்துறையினர் பாதுகாப்பு பணியில் ஈடுபட்டனர். நேற்று மட்டும் இப்பகுதிகளில் நுாற்றுக்கும் மேற்பட்ட சிலைகள் கரைக்கப்பட்டதாக, போலீசார் தெரிவித்தனர்.