திருக்கோவிலூர்; ஆதிதிருவரங்கம் அரங்கநாதர் கோவில் தேர் செய்யும் பணி 50 சதவீதம் நிறைவடைந்துள்ளது.

மணலூர்பேட்டை அடுத்த ஆதிதிருவரங்கத்தில் பழமை வாய்ந்த அரங்கநாதன் திருக்கோவில் உள்ளது. புராண இதிகாசங்களில் இத்தளத்தின் பெருமை விரிவாக கூறப்பட்டுள்ளது. சிறப்பு வாய்ந்த இத்தளத்தில் ஒவ்வொரு ஆண்டும் பங்குனி மாதம் பிரம்மோற்சவத்தின் போது தேர் பவனி வரும். தேர் சிதிலமடைந்த நிலையில் 200 ஆண்டுகளுக்கும் மேலாக தேரோட்டம் நடைபெறாமல் தடைப்பட்டது. பழமை வாய்ந்த தளத்தின் பெருமையை புணரமைக்கும் வகையில் மீண்டும் தேரோட்டம் நடத்துவதற்கு ஏதுவாக, புதியதாக தேர் செய்வதற்கு தொகுதி எம்.எல்.ஏ., வசந்தம் கார்த்திகேயன் பரிந்துரையின் பேரில், ரூ. 78.50 லட்சம் மதிப்பீட்டில் தேர்வு செய்வதற்கு ஹிந்து சமய அறநிலையத்துறை நிதி ஒதுக்கி பணிகளை துவக்கியது. நேற்று தேர் செய்யும் பணியை மாவட்ட அறங்காவல் குழு தலைவர் பாலாஜி பூபதி, செயல் அலுவலர் பாக்யராஜ் நேரில் ஆய்வு செய்தனர். தேர் செய்யும் பணி 50 சதவீதம் நிறைவடைந்திருக்கும் நிலையில், சிறப்பான வகையில் பணியை மேற்கொள்ளவும், எதிர்வரும் பங்குனி மாத பிரம்மோற்சவ விழாவில் தேரோட்டம் நடைபெறுவதற்கு ஏதுவாக பணியை விரைவாக முடிக்க தேர் செய்யும் பணியாளர்களிடம் தெரிவிக்கப்பட்டது.