மானாமதுரை; மானாமதுரை ஆனந்தவல்லி சோமநாதர் கோயில் சித்திரை திருவிழா வருகிற ஏப்.14ம் தேதி கொடியேற்றத்துடன் துவங்கவுள்ளது.

சிவகங்கை சமஸ்தானம் தேவஸ்தானம் நிர்வாகத்திற்குட்பட்ட மானாமதுரை ஆனந்தவல்லி சோமநாதர் கோயிலில் வருடந்தோறும் சித்திரை திருவிழா தொடர்ந்து 10 நாட்கள் நடைபெறும்.விழா நாட்களின் போது சுவாமிகள் பல்வேறு வாகனங்களில் எழுந்தருளி வீதி உலா நடைபெறும்.கோவில் முன்பாக வைகை ஆற்றில் தினந்தோறும் கலை நிகழ்ச்சிகளும் நடைபெறும். வைகை ஆற்றுக்குள் சிறுவர்களுக்காக ராட்டினங்கள் மற்றும் ஏராளமான பொழுதுபோக்கு அம்சங்கள் இடம்பெற்றிருக்கும்.இந்த வருடத்திற்கான சித்திரை திருவிழா வருகிற ஏப்.14ம் தேதி ஞாயிற்றுக்கிழமை காலை 10:00 மணியிலிருந்து 10:30மணிக்குள் கொடியேற்றத்துடன் துவங்க உள்ளது. விழாவின் முக்கிய நிகழ்ச்சியான திருக்கல்யாணம் ஏப்.21ம் தேதி ஞாயிற்றுக்கிழமை காலை 9:00 மணியிலிருந்து 10:30 மணிக்குள்ளும், ஏப்ரல் 22ம் தேதி திங்கட்கிழமை காலை 10 மணிக்கு தேரோட்ட நிகழ்ச்சியும் நடைபெற உள்ளது. விழாவிற்கான ஏற்பாடுகளை தேவஸ்தான மேலாளர் இளங்கோ, கண்காணிப்பாளர் சீனிவாசன், பரம்பரை ஸ்தானீகர்கள் செய்து வருகின்றனர்.சித்திரைத் திருவிழா தூங்குவதற்கு இன்னும் 2 வாரங்களே உள்ள நிலையில் மானாமதுரை நகராட்சி நிர்வாகம் சார்பில் ரூ.8 லட்சம் செலவில் வைகை ஆற்றை சீரமைக்கும் பணி துவங்கி நடைபெற்று வருகிறது. இப்பணிகளை நகராட்சி தலைவர் மாரியப்பன் கென்னடி, துணைத்தலைவர் பாலசுந்தரம்,கமிஷனர் ரங்கநாயகி, பொறியாளர் சீமா ஆகியோர் பார்வையிட்டு வருகின்றனர்.