அருப்புக்கோட்டை; அருப்புக்கோட்டை சொக்கலிங்கபுரம் மீனாட்சி சொக்கநாதர் கோயிலில் ஆனி பிரம்மோற்சவ விழாவை முன்னிட்டு திருக்கல்யாணம் நடந்தது. பிரம்மோற்சவ விழா ஜூன் 10 ம் தேதி கொடியேற்றத்துடன் துவங்கியது. தொடர்ந்து 13 நாட்கள் நடைபெறும் விழாவில், 10 ம் நாள் விழாவாக நேற்று இரவு 7.30 மணிக்கு, மீனாட்சி - சொக்கநாதர் திருக்கல்யாணம் நடந்தது. கோயில் வளாகத்தின் முன்பு நடந்த திருக்கல்யாணத்தில் திரளான பக்தர்கள் கலந்து கொண்டனர். கலந்துகொண்ட பெண்களுக்கு திருமாங்கல்யம் வளையல் மஞ்சள் உள்ளிட்ட மங்களப் பொருட்கள் வழங்கப்பட்டது. இன்று மாலை 4.45 மணிக்கு தேர் வடம் பிடிக்கும் நிகழ்ச்சி நடைபெற உள்ளது. சுவாமி, அம்மன் திரு தேர்களில் திரு வீதி எழுந்தருளல் நிகழ்ச்சி நடைபெறும். ஏற்பாடுகளை கோயில் நிர்வாகத்தினர் செய்து வருகின்றனர்.