விழுப்புரம்; ப.வில்லியனூர் ஸ்ரீ லட்சுமி நாராயணப் பெருமாள் கோவிலில் சிரவண தீபம் ஏற்றி வழிபாடு நடந்தது.

விழுப்புரம் அடுத்த ப.வில்லியனூரில், கல்யாண தடை நீக்கும் பிரசித்தி பெற்ற கனகவல்லி நாயகா சமேத லட்சுமிநாராயண பெருமாள் கோவிலில் சிரவண தீபம் ஏற்றி வழிபாடு நடந்தது. திருவோண நட்சத்திரத்தை முன்னிட்டு நேற்று காலை 6:00 மணிக்கு மூலவர் பெருமாளுக்கும், உற்சவர் பெருமாளுக்கும் திருமஞ்சனம் நடந்தது. இதனைத் தொடர்ந்து, மூலவர் பெருமாளுக்கு சிறப்பு அலங்காரம் செய்யப்பட்டு, கனகவல்லி தாயார் உடன் பக்தர்களுக்கு அருள் பாலித்தார். தொடர்ந்து, உற்சவர் பெருமாளுக்கும் சிறப்பு மலர் அலங்காரம் செய்யப்பட்டு, தீபாராதனையுடன், காலை 9:00 மணிக்கு திருவீதியுலா புறப்பாடு நடந்தது. தொடர்ந்து மாலை 4:00 மணிக்கு உறியடி உற்சவம் நடந்தது. இதில் திரளான பக்தர்கள் கலந்துகொண்டு உறியடித்து கொண்டாடினர். தொடர்ந்து மாலை 6:00 மணிக்கு சிரவண தீபம், கருட கம்பத்தில் ஏற்றப்பட்டது. இந்த விழாவில் ஏராளமான பக்தர்கள் கலந்துகொண்டு சாமி தரிசனம் செய்தனர்.