திருப்போரூர்; திருப்போரூரில் புகழ்பெற்ற கந்தசுவாமி கோவில் உள்ளது. இங்கு, ஆண்டுதோறும் நடைபெறும் கந்தசஷ்டி விழா, நேற்று முன்தினம் கொடியேற்றத்துடன் துவங்கியது. இரவு கந்தபெருமான் கிளி வாகனத்தில் மாட வீதி உலா வந்தார். தொடர்ந்து, நேற்று இரண்டாம் நாள் உற்சவம் நடந்தது. இதில், காலை 9:00 மணிக்கு, கந்தபெருமான் வள்ளி, தெய்வானையுடன் சிறப்பு அலங்காரத்தில், பல்லக்கு உற்சவத்தில், மாடவீதி உலா வந்து பக்தர்களுக்கு அருள்பாலித்தார். தொடர்ந்து, உற்சவர் கந்தசுவாமிக்கு லட்சார்ச்சனை நடந்தது. இரவு ஆட்டுக்கடா வாகனத்தில், சுவாமி வீதி உலா நடைபெற்றது. அதேபோல், விழாவை முன்னிட்டு, கோவில் வளாகம் முழுதும் வண்ண மின் விளக்குகள் பொருத்தப்பட்டு, இரவில் பிரமாண்டமாக ஜொலித்தது. பிரதான ஓ.எம்.ஆர்., சாலையை ஒட்டி கோவிலும், சரவண பொய்கை குளமும் அமைந்திருப்பதால், சாலையில் செல்லும் ஏராளமான வாகன ஓட்டிகள், கோவிலுக்கு வரும் பக்தர்கள் பார்த்து ரசித்து சென்றனர்.