பீஜிங்,: புத்த மத நுால்களின் வாயிலாக, ராமாயணம் தொடர்பான கருத்துக்கள், சீனாவில் பல நுாற்றாண்டுகளுக்கு முன் புழக்கத்தில் இருந்தது. இதன் வாயிலாக சீனாவில் ஹிந்து மதத்தின் தாக்கம் இருந்துள்ளது என, ஆராய்ச்சியாளர்கள் தெரிவித்துள்ளனர்.

நம் அண்டை நாடான சீனாவில் உள்ள இந்திய துாதரகம் சார்பில், ராமாயணம் தொடர்பான கருத்தரங்கம் பீஜிங்கில் நடந்தது. இதில் பங்கேற்ற பல சீன வரலாற்று ஆராய்ச்சியாளர்கள், சீனாவில், ராமாணயத்தின் சுவடுகள் இருந்ததாகக் கூறியுள்ளனர். ஷின்குவா பல்கலைக்கழக சர்வதேச மையத்தின் தலைவர் டாக்டர் ஜியாங் ஜிங்குய் கூறியுள்ளதாவது: இந்தியாவின், குறிப்பாக ஹிந்து மதத்தின் மிகப் பெரும் இதிகாசங்களில் ஒன்றான ராமாயணம், பல நுாற்றாண்டுகளுக்கு முன், சீனாவிலும் அதன் தாக்கத்தை ஏற்படுத்தியிருந்தது. குறிப்பாக புத்த மத நுால்களின் வாயிலாக, ராமாயணம் சீனாவில் அறிமுகமானது. இது, சீனாவின் முக்கியமான ஹான் கலாசாரத்தில் தாக்கத்தை ஏற்படுத்தியது. அது ஏற்றுக் கொள்ளப்பட்டது. இது சீனாவின் கட்டுப்பாட்டில் உள்ள திபெத்தின் கலாசாரம் குறித்த புதிய பரிமாணத்தை ஏற்படுத்துகிறது. ராமாயணத்தில் உள்ள தசரசன், ஹனுமான் ஆகியோரின் பெயர்கள், இந்த கலாசாரங்களில் குறிப்பிடப்பட்டுள்ளது. இவ்வாறு அவர் கூறினார்.