சென்னை; திருமலை, திருப்பதி வெங்கடேஸ்வர பெருமாள் கோவிலில், தினசரி அதிகாலை முதல் நள்ளிரவு வரை, பல சேவைகள் நடக்கின்றன. அவற்றில் ஏப்., மாதம் நடக்கவுள்ள சேவைகளுக்கான முன்பதிவு தேதிகள் அறிவிக்கப்பட்டுள்ளன. அதன்படி, ஸ்ரீவாரி ஆர்ஜித சேவைக்கான கல்யாண உற்சவம், ஊஞ்சல் சேவை, ஆர்ஜித பிரம்மோற்சவம், சகஸ்ர தீப அலங்கார சேவைகளுக்கு, இன்று காலை 10:00 மணிக்கு முன்பதிவு துவங்குகிறது. இந்த ஆண்டுக்கான வசந்த உற்சவ சேவை, ஏப்., 10 முதல் 12 வரை நடக்கிறது. அதற்கான முன்பதிவு, இன்று காலை 10:00 மணிக்கு துவங்குகிறது. ‘ஆன்லைன்’ வாயிலாக தரிசிக்கும் சேவைகளுக்கான முன்பதிவு, இன்று மாலை 3:00 மணிக்கு துவங்குகிறது. அங்கப்பிரதக்‌ஷனம் செய்வதற்கான முன்பதிவுக்கு, வரும் 23ம் தேதி காலை 10:00 மணிக்கும்; மூத்த குடிமக்கள், மாற்றுத்திறனாளிகள் தரிசனத்திற்கான முன்பதிவு, மாலை 3:00 மணிக்கும் துவங்குகிறது. ஏப்., மாத சிறப்பு தரிசனம், 300 ரூபாய்க்கான முன்பதிவு, வரும் 24ம் தேதி காலை 10:00 மணிக்கு துவங்குகிறது. அன்று மாலை 3:00 மணிக்கு, திருமலை மற்றும் திருப்பதியில் தங்கும் விடுதிகளுக்கான முன்பதிவு துவங்குகிறது.