மதுரை; மதுரை மீனாட்சி அம்மன் கோயில் தை தெப்பத்திருவிழா ஜன.31ல் கொடியேற்றத்துடன் துவங்குகிறது. இதையொட்டி மாரியம்மன் தெப்பக்குளத்தில் நேற்று முகூர்த்த கால் ஊன்றப்பட்டது.

தெப்பத்திருவிழா கொடியேற்றம் ஜன.31 காலை சுவாமி சன்னதி கொடிமரத்தில் காலை 10:05 மணிக்கு மேல் 10:29 மணிக்குள் நடக்கிறது. விழா நடக்கும் 12 நாட்களும் காலை, இரவு சுவாமியும், அம்மனும் பல்வேறு வாகனங்களில் எழுந்தருளுகின்றனர். விழாவின் முக்கிய நிகழ்வாக பிப்.5ல் திருஞானசம்பந்தர் சைவ சமய வரலாற்று லீலை, பிப்.7 வலைவீசி அருளிய லீலை, பிப்.8 ல் இரவு சப்தாவரணம், பிப்.9 ல் தெப்பம் முட்டுத்தள்ளுதல் நிகழ்ச்சி நடக்கிறது. பிப்.10ல் சிந்தாமணியில் கதிரறுப்பு திருவிழாவை தொடர்ந்து, பிப்.11ல் தெப்பத்திருவிழா நடக்கிறது. அன்று அதிகாலை மீனாட்சி அம்மன், சுவாமி சுந்தரேஸ்வரர் கோயிலில் இருந்து புறப்பட்டு தெப்பக்குளம் வருவர். அங்கு அலங்கரிக்கப்பட்ட தெப்பத்தில் சுவாமியும், அம்மனும் காலை 8:35 மணி முதல் 8:59 மணிக்குள் எழுந்தருளி தெப்பத்திருவிழா நடைபெறும். காலை இரு முறையும், இரவு ஒரு முறையும் தெப்பத்தை வலம் வந்து பக்தர்களுக்கு அருள்பாலிப்பர். பின்னர் இரவு 7:00 மணிக்கு மேல் சுவாமி தங்க குதிரை வாகனத்திலும், அம்மன் அவுதா தொட்டிலிலும் எழுந்தருளி மீண்டும் கோயிலுக்கு புறப்படுவர். அன்று சுவாமி தெப்பத்திற்கு சென்று மீண்டும் கோயிலுக்கு திரும்பும் வரை மீனாட்சி அம்மன் கோயில் நடை சாத்தப்பட்டு இருக்கும்.