திருப்பூர்; தை அமாவாசையான இன்று மறைந்த முன்னோர்களுக்கு தர்ப்பணம் செய்து, சிறப்பு வழிபாடு நடத்தப்பட்டது. அமாவாசை தோறும், குடும்பத்தின் மறைந்த முன்னோருக்கு, ஆண்கள் தர்ப்பணம் செய்து வழிபடுவது வழக்கம். இயலாதவர்கள், ஆடி அமாவாசை, புரட்டாசி அமாவாசை மற்றும் தை அமாவாசையில் மட்டுமாவது, தர்ப்பணம் கொடுத்து வழிபடுகின்றனர். தை அமாவாசையான இன்று அவிநாசி, பல்லடம், திருப்பூரில் உள்ள கோவில்களில், தர்ப்பணம் கொடுக்கும் நிகழ்ச்சி நடந்தது. திருப்பூர் பார்க்ரோடு ராகவேந்திரா கோவிலில் நடந்த நிகழ்ச்சியில், ஆண்கள் தர்ப்பணம் கொடுத்து வழிபட்டனர். கருப்பு எள், மலர்கள், வாழைப்பழம் மற்றும் தண்ணீரை, வைத்து, தர்ப்பை புற்களால் எடுத்து முன்னோருக்கு தர்ப்பணம் செய்தனர். தொடர்ந்து, பச்சை காய்கறிகள், பச்சரிசி ஆகியவற்றை தட்சணையாக வழங்கி ஆசிபெற்றனர்.