உடன்குடி: குலசேகரபட்டணம் முத்தராம்மன் கோயிலில் 1008 பால்குடம் பவனி நடந்தது. ஸ்ரீ காமதேனு குரூப்ஸ் அபிஷேக வழிபாட்டு மன்றம், ஸ்ரீ ராஜலட்சுமி குரூப்ஸ் மற்றும் ஆன்மீக பெருமக்கள் இணைந்து 6வது ஆண்டாக குலசேகரன்பட்டணம் முத்தராம்மன் கோயிலில் ஆங்கில புத்தாண்டை முன்னிட்டு 1008 பால்குடம் அபிஷேக விழா நடந்தது. இதனையொட்டி டிச. 31ம் தேதி முத்தாரம்மன் கோயிலில் மஹா அபிஷேக அலங்கார தீபாரதனையும், இரவு சிறப்பு அன்னதானமும், இரவு நையாண்டி மேளம், கரகாட்டம், குறவன் குறத்தி ஆட்டமும் தொடர்ந்து பக்தி கச்சேரியும் நடந்தது. ஆங்கில புத்தாண்டை முன்னிட்டு காலையில் மஹா கணபதி ஹோமம், நவக்கிரகஹோமம், கஜபூஜை, கோபூஜை, மஹாலட்சுமி பூஜை, தொடர்ந்து ஏகாதச ருத்ர சுக்த, துர்கா சுக்த, மஹா ஹோம 108 கலச பூஜை, மதியம் குலசை அறம்வளர்த்த நாயகி அம்மன் கோயிலில் இருந்து 1008 பால்குடம் புறப்படுதல், அதைத்தொடர்ந்து திரவியாஹீதி, வஸ்த்ராஹீ தி பூர்ணாஹீதி மஹா தீபாரதனை நடந்தது. அதைத்தொடர்ந்து 1008 பால் குடம் அபிஷேகம், 108 கலசாபிஷேகம், 108 சங்காபிஷேகம், மஹா அபிஷேக அலங்கார தீபாரதனை நடந்தது. இரவு 1008 திருவிளக்கு பூஜையும், அம்மன் ஊஞ்சல் சேவையும், இரவு புஷ்ப ஸஹஸ்ரநாமாவளி அர்ச்சனை, அன்னை முத்தாரம்மன் தேரில் திருபவனி ஆகிய நிகழ்ச்சிகள் நடந்தது. 1008 பால்குடம் பவனி, 1008 திருவிளக்கு பூஜையில் ஏராளமான பெண்கள் கலந்து கொண்டனர். மேலும் குலசை முத்தாரம்மன் கோயில் முன்னாள் அறங்காவலர் குழுத்தலைவர் கண்ணன், குலசை முத்தாரம்மன் தசரா குழு ஜெயமோகன், உடன்குடி பஞ்., யூனியன் துணைச்சேர்மன் ராஜதுரை, பாரத திருமுருகன் திருச்சபை தலைவர் மோகனசுந்தரம், ஆனந்தன் உட்பட பலர் கலந்து கொண்டனர். பக்தர்களின் வசதிக்காக காலை முதல் மாலை வரை அன்னதானம் வழங்கப்பட்டது. ஏற்பாடுகளை ஸ்ரீ காமதேனு குரூப்ஸ் அபிஷேக வழிபாட்டு மன்றம், ஸ்ரீராஜலட்சுமி குரூப்ஸ் மற்றும் ஆன்மீக நண்பர்கள் செய்திருந்தனர்.