மதுரை, அக். 15: மதுரை மீனாட்சி சுந்தரேசுவரர் திருக்கோயிலில் நடைபெற்று வரும் நவராத்திரி திருவிழாவின் ஐந்தாம் நாளான நேற்று (வியாழக்கிழமை), அன்னை மீனாட்சி தபசு திருக்கோலத்தில் பக்தர்களுக்குக் காட்சியளித்தார். சிறப்பு அலங்காரத்தில் அருள்பாலித்த அன்னை மீனாட்சியைத் தரிசிக்க ஏராளமான பக்தர்கள் கோயிலுக்கு வருகை தந்து நீண்ட வரிசையில் காத்திருந்து சுவாமி தரிசனம் செய்தனர்.

மதுரை மீனாட்சி அம்மன் கோயிலில் ஆண்டுதோறும் நடைபெறும் முக்கிய விழாக்களில் ஒன்றான நவராத்திரி திருவிழா, இந்த ஆண்டு அக்டோபர் 11-ஆம் தேதி தொடங்கி அக்டோபர் 20-ஆம் தேதி வரை 10 நாள்கள் நடைபெறுகிறது. விழாவையொட்டி, அம்மன் சன்னதியின் இரண்டாம் பிரகாரத்தில் உள்ள கொலு மண்டபத்தில் எழுந்தருளும் உற்சவர் மீனாட்சி அம்மனுக்கு ஒவ்வொரு நாளும் வெவ்வேறு சிறப்பு அலங்காரங்கள் செய்யப்பட்டு அபிஷேக, ஆராதனைகள் நடைபெறுகின்றன. விழாவின் முதல் நாளான அக்டோபர் 11-ஆம் தேதி அன்னை மீனாட்சி ராஜராஜேஸ்வரி அலங்காரத்திலும், இரண்டாம் நாளான அக்டோபர் 12-ஆம் தேதி அர்த்தநாரீசுவரர் திருக்கோலத்திலும், மூன்றாம் நாளான அக்டோபர் 13-ஆம் தேதி கோலாட்டம் அலங்காரத்திலும், நான்காம் நாளான அக்டோபர் 14-ஆம் தேதி பட்டாபிஷேகத் திருக்கோலத்திலும் காட்சியளித்தார். ஐந்தாம் நாளான நேற்று தபசு திருக்கோலத்தில் அன்னை மீனாட்சி அருள்பாலித்தார்.

நவராத்திரி விழாவையொட்டி, மீனாட்சி அம்மன் சன்னதி மற்றும் கொலு மண்டபம் வண்ண மலர்களால் அலங்கரிக்கப்பட்டுள்ளன. கோயிலின் இரண்டாம் பிரகாரத்தில் அமைக்கப்பட்டுள்ள 11 அரங்குகளில் பல்வேறு தெய்வங்களின் திருவுருவச் சிலைகள், அம்பிகையின் அவதாரங்கள் மற்றும் திருவிளையாடல் புராணக் காட்சிகள் இடம்பெற்றுள்ளன. இவற்றைப் பக்தர்கள் பார்வையிட்டு வருகின்றனர். மேலும், கோயில் திருக்கல்யாண மண்டபத்தில் தினமும் காலை 9 மணி முதல் நண்பகல் 1 மணி வரையிலும், மாலை 4.30 மணி முதல் இரவு 9.30 மணி வரையிலும் பல்வேறு கலை நிகழ்ச்சிகள் நடைபெறுகின்றன. இதில் ஆன்மிகச் சொற்பொழிவுகள், திருமுறை இன்னிசை, பக்தி இன்னிசை, பரதநாட்டியம், வீணை இசைக் கச்சேரி, கர்நாடக சங்கீதம் உள்ளிட்ட நிகழ்ச்சிகள் இடம்பெறுகின்றன. இதனால் நவராத்திரி விழா நாள்களில் கோயில் வளாகம் ஆன்மிகம் மற்றும் கலை நிகழ்ச்சிகளுடன் விழாக்கோலம் பூண்டுள்ளது. நவராத்திரி விழா நாள்களில் கொலு மண்டபத்தில் எழுந்தருளும் உற்சவர் அன்னை மீனாட்சிக்கு மட்டுமே தேங்காய் உடைத்தல் மற்றும் அர்ச்சனைகள் செய்யப்படும். மூலஸ்தான அம்மன் சன்னதியில் திரை போட்டு அபிஷேகம், அலங்காரம் உள்ளிட்ட பூஜைகள் நடைபெறும் நேரங்களில், மூலஸ்தான அம்மனுக்கு நேரடியாகத் தேங்காய் உடைத்தல் மற்றும் அர்ச்சனைகள் நடத்தப்படாது எனக் கோயில் நிர்வாகம் அறிவித்துள்ளது.