திருமலை, திருமலை திருப்பதியில் நடைபெற்று வரும் ஸ்ரீ வெங்கடேஸ்வர சுவாமியின் நவராத்திரி பிரம்மோற்சவத்தின் ஐந்தாம் நாளில், மலையப்ப சுவாமி மோகினி அலங்காரத்தில் எழுந்தருளி பக்தர்களுக்கு அருள்பாலித்தார். அழகிய ஆபரணங்களால் அலங்கரிக்கப்பட்ட பெருமாள், கண்களைக் கவரும் ஜகன்மோகன வடிவத்தில் காட்சியளித்தார். அவருடன் தனி திருச்சியில் ஸ்ரீ கிருஷ்ணரும் எழுந்தருளி பக்தர்களுக்கு அருளாசி வழங்கினார்.

பக்திப் பாடல்கள், கோலாட்டத்துடன் கோலாகலம்: அலங்கரிக்கப்பட்ட கோயில் யானைகள் முன்னே செல்ல, பாரம்பரிய கோயில் இசை முழங்க, பஜனைப் பாடல்களும் கோலாட்ட நிகழ்ச்சிகளும் நடைபெற்றன. ஜீயர்கள் வேத மற்றும் திவ்யப் பிரபந்த பாராயணங்களில் ஈடுபட்டனர். ஊர்வலப் பாதை முழுவதும் பக்தர்கள் கற்பூர ஆரத்தி எடுத்து மலையப்ப சுவாமியை வழிபட்டனர். பெருமாளின் மோகினி அலங்காரத்தைக் காண ஏராளமான பக்தர்கள் திரண்டதால் திருமலை முழுவதும் பக்திப் பரவசம் நிறைந்திருந்தது.

மோகினி அவதாரம் உணர்த்தும் தத்துவம்: மோகினி அவதாரம், உலக வாழ்க்கையில் மனிதர்களைச் சூழ்ந்துள்ள மாயை மற்றும் உலகப் பற்றுகளைக் கடந்து இறைவனின் உண்மையான தன்மையை உணர வேண்டும் என்ற ஆழமான ஆன்மிகச் செய்தியை எடுத்துரைக்கிறது. இந்த உலகம் இறைவனின் தெய்வீக லீலையின் ஒரு பகுதி என்பதை உணர்ந்து, அவரது அருளால் மாயைகளைக் கடந்து ஆன்மிக உயர்வை அடையலாம் என்பதையே மோகினி அவதாரம் உணர்த்துவதாகக் கருதப்படுகிறது. இந்த வாகன சேவையில் பெரிய ஜீயர் சுவாமிகள், சின்ன ஜீயர் சுவாமிகள், திருமலை திருப்பதி தேவஸ்தான செயல் அலுவலர் முட்டாடா ரவிச்சந்திரா, கூடுதல் செயல் அலுவலர் சி. வெங்கையா சௌத்ரி, அறங்காவலர் குழு உறுப்பினர்கள், இணை செயல் அலுவலர்கள் டாக்டர் ஏ. சரத், பிரபால கோபிநாத், தலைமை விஜிலென்ஸ் மற்றும் பாதுகாப்பு அதிகாரி முரளி கிருஷ்ணா, காவல் கண்காணிப்பாளர் சுப்பராயுடு உள்ளிட்ட பல்வேறு அதிகாரிகளும் முக்கியப் பிரமுகர்களும் கலந்து கொண்டனர்.