திருப்பரங்குன்றம்: தமிழக அரசின் உத்தரவுப்படி திருப்பரங்குன்றம் சுப்பிரமணிய சுவாமி கோயிலில் நிர்வாகமே பஞ்சாமிர்தம் தயாரித்து விற்பனை செய்வதற்காக புதிய இயந்திரம் இன்று கோயிலுக்கு வந்தது.‌ கோயிலில் கடந்த ஆண்டு வரை பஞ்சாமிர்தம் விற்பனை தனியாருக்கு ஏலம் விடப்பட்டது. கடந்த ஆண்டு ரூ. 31.14 லட்சத்திற்கு பஞ்சாமிர்தம், விபூதி விற்பனை ஏலம் போனது. திருப்பரங்குன்றம் சுப்பிரமணிய சுவாமி கோயிலில் பிரசாதங்களை கோயில் நிர்வாகமே தயாரித்து விற்பனை செய்வதை தொடர்ந்து பஞ்சாமிர்தத்தையும் தயாரித்து விற்பனை செய்ய புதிதாக பொறுப்பேற்ற த.வெ.க., அரசு ஜூன் மாதம் உத்தரவிட்டது. அதன்படி திருப்பரங்குன்றம் சுப்பிரமணிய சுவாமி கோயிலில் பஞ்சாமிர்தம் விற்பனை ஏலம் ரத்து செய்யப்பட்டது.‌ 

அரசின் உத்தரவுப்படி ‌கோயில் சார்பில் பஞ்சாமிர்தம் தயாரித்து விற்பனை செய்யவதற்கான ஏற்பாடுகள் செய்வதற்கு கால தாமதம் ஆகும் என்பதால் அதுவரை சோலைமலை முருகன் கோயிலில் தயாரிக்கப்படும் பஞ்சாமிர்தத்தை வாங்கி ஜூலை 1 முதல் திருப்பரங்குன்றம் சுப்பிரமணிய சுவாமி கோயிலில் விற்பனை செய்யப்பட்டு வருகிறது. இந்நிலையில் திருப்பரங்குன்றம் சுப்பிரமணிய சுவாமி கோயில் நிர்வாகமே பஞ்சாமிர்தம் தயாரிக்க பணிகளை துவக்கி, முதல் கட்டமாக கோவை தனியார் நிறுவனத்திடம் இருந்து அரசு விதிமுறைகளுக்கு உட்பட்டு ரூ. 6 லட்சம் மதிப்பில் பஞ்சாமிர்தம் தயாரிக்கும் இயந்திரம் இன்று கோயிலுக்கு வரவழைக்கப்பட்டது.‌ பஞ்சாமிர்தம் தயாரிக்க தேவைப்படும் கற்பூரவல்லி வாழைப்பழம், கால் கிலோ, அரை கிலோ அளவில் பஞ்சாமிர்தம் அடைக்க லேபிள் ஒட்டிய தரமான டப்பாக்கள் சப்ளை செய்வதற்கு டெண்டர் கோரப்பட்டுள்ளது. தவிர பஞ்சாமிர்தம் தயாரிக்க தேவைப்படும் நாட்டு சக்கரை, கற்கண்டு, பேரிச்சம்பழம், தேன், ஏலக்காய், நெய் உள்ளிட்ட பொருள்களை அரசு அங்கீகரிக்கப்பட்ட நிறுவனங்களில் கோயில் நிர்வாகமே நேரடியாக கொள்முதல் செய்யவும் திட்டமிடப்பட்டுள்ளது. கந்த சஷ்டி திருவிழா நிறைவடைந்ததும் பஞ்சாமிர்தம் தயாரிக்கும் வெள்ளோட்ட பணிகள் முடிந்து கோயில் நிர்வாகம் பஞ்சாமிர்தம் தயாரித்து பக்தர்களுக்கு விற்பனை செய்யப்பட உள்ளது.