நத்தம் கோவில்பட்டி அக்ரஹாரத்தில் உள்ள பாமா, ருக்மணி சமேத வேணுகோபால சுவாமி கோவிலில் அதிகாலை விஸ்வரூப தரிசனத்துடன் வழிபாடுகள் தொடங்கின. இதையடுத்து சுவாமிக்கு அபிஷேகப் பொருட்களைக் கொண்டு சிறப்பு திருமஞ்சனம் நடைபெற்றது. தொடர்ந்து சுவாமிக்கு புத்தாடை அணிவித்து, துளசி மற்றும் பல்வேறு வண்ண மலர் மாலைகளால் அலங்காரம் செய்யப்பட்டது. தொடர்ந்து பூஜைகள் மற்றும் மகா தீபாராதனை நடைபெற்றது. இதில் சுற்றுவட்டார கிராமங்களைச் சேர்ந்த ஏராளமான பக்தர்கள் விளக்கேற்றி சுவாமி தரிசனம் செய்தனர்.
இதேபோல் சாணார்பட்டி அருகே வி.மேட்டுப்பட்டி கதிர் நரசிங்க பெருமாள் கோவிலிலும் விஷ்ணுபதி புண்ணியகால சிறப்பு வழிபாடு நடைபெற்றது. இதையொட்டி ஸ்ரீதேவி, பூதேவி சமேத கதிர் நரசிங்க பெருமாள் மற்றும் மூலவர் ராமானுஜர் சுவாமிக்கு சிறப்பு திருமஞ்சனம், விஸ்வரூப பூஜைகள் நடைபெற்றன. பால், பழம், பன்னீர், இளநீர், சந்தனம் உள்ளிட்ட 21 திரவியங்களைக் கொண்டு அபிஷேகம் செய்யப்பட்டது. தொடர்ந்து சுவாமிக்கு பல வண்ண மலர்களால் அலங்காரம் செய்யப்பட்டு, துளசி மாலைகள் சாத்தப்பட்டு சிறப்பு தீபாராதனைகள் நடைபெற்றன. மேலும் அருகிலுள்ள ஆஞ்சநேயர் சன்னதியிலும் சிறப்பு பூஜைகள் நடைபெற்றன. விஷ்ணுபதி புண்ணியகால வழிபாட்டின் ஒரு பகுதியாக பக்தர்கள் கொடிமரத்தை வணங்கி, மலர்களை சமர்ப்பித்து கோவில் பிரகாரத்தை 27 முறை வலம் வந்து வழிபட்டனர். இதில் கோபால்பட்டி, சாணார்பட்டி, நத்தம், திண்டுக்கல் உள்ளிட்ட பல்வேறு பகுதிகளைச் சேர்ந்த ஏராளமான பக்தர்கள் கலந்து கொண்டு கோவிந்தா கோஷம் முழங்க சுவாமி தரிசனம் செய்தனர். தொடர்ந்து பக்தர்களுக்கு அன்னதானம் வழங்கப்பட்டது. வைகாசி, ஆவணி, கார்த்திகை, மாசி ஆகிய மாதங்களின் முதல் நாளில் கடைப்பிடிக்கப்படும் விஷ்ணுபதி புண்ணியகாலத்தில் மகாவிஷ்ணுவையும், மகாலட்சுமியையும் வழிபடுவது சிறப்பானதாக கருதப்படுகிறது. இந்த புண்ணிய காலத்தில் பெருமாளை வழிபட்டு பிரார்த்தனை செய்தால் குடும்பத்தில் நன்மை, செல்வ வளம், மன அமைதி கிடைக்கும் என்பது பக்தர்களின் நம்பிக்கையாக உள்ளது.