செஞ்சி: சிங்கவரம் ரங்கநாதர் கோவில் பிரம்மோற்சவ விழா நேற்று கொடியேற்றத்துடன் துவங்கியது.செஞ்சி அடுத்த சிங்கவரம் ரங்கநாதர் கோவில் 10 நாள் பிரம்மோற்சவ விழா நேற்று கருட கொடியேற்றத்துடன் துவங்கியது. இதை முன்னிட்டு நேற்று முன்தினம் மாலை அங்குரார்பணம் நடந்தது. நேற்று காலை ரங்கநாதர், தாயாரம்மாளுக்கு சிறப்பு திருமஞ்சனம் செய்தனர். காலை 7.30 மணிக்கு பூதேவி, ஸ்ரீதேவி சமேத ரங்கநாதர் கொடிமரத்தினருகே எழுந்தருளினார். தொடர்ந்து மங்கள இசையும், கோவிந்தா கோஷத்துடன் கருட கொடியேற்றம் நடந்தது. சூர்ய பிரபையில் சுவாமி ஊர்வலம் நடந்தது.பிரம்மோற்சவத்தின் முக்கிய விழாக்களான கருட சேவை இம்மாதம் 8ம் தேதி இரவும், திருத்தேர் வடம் பிடித்தல் 10ம் தேதி காலை 9.15 மணிக்கும் நடக்கிறது.