நாமக்கல் : சின்னமுதலைப்பட்டி அமச்சி அம்மன் கோவிலில், இன்று (மே, 6) இரவு, 8 மணிக்கு குண்டம் இறங்கும் கோலாகலமாக நடக்கிறது. நாமக்கல் அடுத்த, சின்ன முதலைப்பட்டியில், அமச்சி அம்மன் கோவிலில், ஆண்டு தோறும் தேர்த்திருவிழா, குண்டம் இறங்கும் விழா வெகுவிமரிசையாக நடத்தப்படும். இந்த ஆண்டு விழா, கடந்த, 28ம் தேதி மோகனூர் காவிரி ஆற்றில் இருந்து, தீர்த்தம் எடுத்து வருவதலுடன் துவங்கியது. நேற்று காலை, 8 மணிக்கு, மோகனூர் காவிரி ஆற்றில் இருந்து, அம்மனுக்கு தீர்த்தம் அழைத்து வரப்பட்டது. இரவு, 8 மணிக்கு மறுகாப்பு கட்டப்பட்டு, திருத்தேர் அலங்காரம் செய்யப்பட்டது.இன்று (மே, 6) அதிகாலை, 5 மணிக்கு, திருத்தேர் விழா நடக்கிறது. பழனியாண்டவர் பூஜை, நாகர்பலி பூஜை, வடிசோறு மாவிளக்கு பூஜை, எல்லை கருப்பனார் ஸ்வாமி பூஜை, அம்மன் திருத்தேரில் திருவீதி உலா வந்து பக்தர்களுக்கு அருள்ாபாலிக்கிறார்.மாலை, 4 மணிக்கு, கோவிலில் பொங்கல் வைத்து பூஜை செய்யப்படுகிறது. இரவு, 8 மணிக்கு, சுற்று வட்டாரத்தை சேர்ந்த ஏராளமான பக்தர்கள், குண்டம் இறங்கி அம்மனுக்கு நேர்த்திக்கடன் செலுத்துகின்றனர். அதை தொடர்ந்து, மாவிளக்கு பூஜையும், சிறப்பு வாணவேடிக்கையும் நடக்கிறது.நாளை (மே, 7) காலை, 7 மணிக்கு, கிடா வெட்டும், வண்டி வேஷமும் நடக்கிறது. 8ம் தேதி காலை, 9 மணிக்கு, மஞ்சள் நீராட்டு விழா, அம்மன் திருத்தேரில் எழுந்தருளி திருவீதி உலா வந்து பக்தர்களுக்கு அருள்பாலிக்கிறார். 9ம் தேதி இரவு, 11 மணிக்கு, கருப்பனார் ஸ்வாமிக்கு அடசல் பூஜை நடக்கிறது. ஏற்பாடுகளை கோவில் நிர்வாகிகள், ஊர் மக்கள் செய்துள்ளனர்.