திருச்சி: திருச்சி, சமயபுரம் மாரியம்மன் கோவில் கும்பாபிஷேகம் விழா, விக்னேஸ்வர பூஜையுடன் இன்று துவங்குகிறது.தமிழகத்தில் உள்ள சக்தி தலங்களில் பிரசித்தி பெற்ற சமயபுரம் மாரியம்மன் கோவிலில், 2004ல் கும்பாபிஷேகம் செய்யப்பட்டது. 12 ஆண்டுகளுக்கு பின், 25 கோடி ரூபாய் மதிப்பீட்டில், 2010ம் ஆண்டில் கோவில் திருப்பணிகள் துவங்கப்பட்டன.கோவில் திருப்பணிகள் பெரும்பாலும் முடிந்துள்ள நிலையில், ராஜகோபுரம் தவிர, மற்ற கோபுரங்கள், மூலஸ்தான விமானம், அனைத்து சன்னிதிகளுக்கும் வரும், 6ல் கும்பாபிஷேகம் நடத்தப்பட உள்ளது. கும்பாபிஷேக விழா, இன்று காலை, 9:00 மணிக்கு விக்னேஸ்வர பூஜை மற்றும் மகா கணபதி ஹோமத்துடன் துவங்குகிறது. வரும், 3ல் முதல் கால யாக பூஜையும், 4ல் இரண்டு மற்றும் மூன்றாம் கால யாக பூஜையும் நடத்தப்பட உள்ளது. 5ல் நான்கு, ஐந்து கால யாக பூஜை நடத்தப்பட்டு, 6ல் காலை, 7:30 மணிக்குள் மகா கும்பாபிஷேகம் செய்யப்படுகிறது. மறுநாள், 7 முதல் மண்டல பூஜை துவங்குகிறது.