மறைமலைநகர் : அனுமந்தபுரம் அகோர வீரபத்ர சுவாமி கோவிலில், 65 லட்சம் ரூபாய் மதிப்பில், ராஜகோபுரம் அமைக்கும் பணி விறுவிறுப்பாக நடக்கிறது. காஞ்சிபுரம் மாவட்டம், அனுமந்தபுரத்தில் அகோரவீரபத்ர சுவாமி கோவில், இந்து சமய அறநிலையத்துறை பராமரிப்பில் உள்ளது.ஆயிரம் ஆண்டுகள் பழமைவாய்ந்த இக்கோவில், செவ்வாய் தோஷ பரிகார தலமாகவும், சுற்று வட்டார மக்களின் குலதெய்வமாகவும் உள்ளது.

இங்குள்ள குளத்தில் நீராடி, சுவாமியை வழிபட்டு வந்தால் மனநிலை பாதிப்பு, தீராத நோய்கள் நீங்கி குணமடைவதாக பக்தர்கள் நம்புகின்றனர்.சிறப்புமிக்க இக்கோவிலின் முகப்பு பகுதியில், ராஜகோபுரம் அமைக்க வேண்டும் என, பக்தர்கள் நீண்ட நாட்களாக கோரிக்கை வைத்தனர். இதையடுத்து இந்துசமய அறநிலையத் துறை அதிகாரிகள், நன்கொடையாளர்களின் நிதி மூலம், 65 லட்சம் ரூபாய் மதிப்பில், 32 அடி அகலம், 57 அடி உயரத்தில், ஐந்து நிலைகள் உடைய ராஜகோபுரம் அமைக்க முடிவு செய்தனர்; கடந்த ஆண்டு பணிகளை துவக்கினர். கோபுரம் கட்டி முடிக்கப்பட்டு, சுதை சிற்பங்கள் அமைக்கும் பணி நடைபெற்று வருகிறது.