திருவாடானை: திருவாடானை ஆதிரெத்தினேஸ்வரர் கோயிலின் மேற்கூரையில் பல்வேறு இடங்களில் விரிசல் ஏற்பட்டுள்ளதால், சேதமடையும் நிலை ஏற்பட்டுள்ளது. அதிகாரிகள் நடவடிக்கை எடுத்து சீரமைக்க பக்தர்கள் கோரிக்கை விடுத்துள்ளனர். திருவாடானை ஆதி ரெத்தினேஸ்வரர் கோயில் மேற்கூரையில் ஏற்பட்டுள்ள விரிசல்கள் குறித்து  கோயில் பணியாளர்கள் கூறியதாவது: நேற்று முன்தினம் (நவம்.,3ல்) கோயில் மேற்கூரைக்கு சென்று பார்வையிட்டபோது, கொடிமரம் இருக்கும் இடத்திற்கு மேல்பகுதியில், விரிசல் ஏற்பட்டிருந்தது. மின்னல் தாக்கியதில் விரிசல் ஏற்பட்டிருக்கலாம்.

இந்து அறநிலைய துறை அதிகாரிகளுக்கு தகவல் தெரியபடுத்தபட்டுள்ளது, என்றனர். பக்தர்கள் கூறியதாவது: அம்மன் சன்னதி தரையில் இதே போல் விரிசல் ஏற்பட்டுள்ளது. மேல்பகுதியில் உள்ள சிறிய கோபுரங்களில் செடிகள் வளர்ந்துள்ளதால் சிலைகள் சேதமடைந்துள்ளது. உடனடியாக பாதிக்கப்பட்ட பகுதிகளை சீரமைக்க அதிகாரிகள் நடவடிக்கை எடுக்கவேண்டும், என்றனர்.