காஞ்சிபுரம் வரதராஜ பெருமாள் கோவிலில் அத்தி வரதர் வைபவம் வெகு விமரிசையாக நடைபெறுகிறது.பக்தர்கள் வசதிக்காக சகஸ்ரநாமம் அர்ச்சனை டிக்கெட் 500 ரூபாய்க்கு ஆன்லைன் மூலம் விற்பனை செய்யப்படுகிறது.இதில் சர்வர் கோளாறு அடிக்கடி ஏற்படுவதாக பிரச்னை எழுந்ததை அடுத்து சரிசெய்யப்பட்டது.

இந்நிலையில் கடந்த வாரம் அறிமுகம் செய்யப்பட்ட 300 ரூபாய் விரைவு தரிசன டிக்கெட்டிலும் சர்வரில் இணைப்பு கிடைக்காமல் முன்பதிவு ரத்தாவதாக புகார் எழுந்துள்ளது.அதாவது www.tnhrce.gov.in என்ற இணையதளத்தில் ஒரு குடும்பத்தில் உள்ள நான்கு பேர் ஒன்றாக பதிவு செய்ய முடியவில்லை.தவிர ஒவ்வொருக்கும் தனித்தனியாக பதிவு செய்யப்படுவதாகவும் அதனால் சர்வர் கோளாறு காரணமாக முன்பதிவு செய்ய முடியாத நிலை ஏற்படுவதாகவும் பக்தர்கள் குற்றம் சாட்டுகின்றனர்.விரைவு தரிசனத்திற்கு பதிவு செய்யும்போது ஏற்பட கூடிய இந்த சிக்கல்களை அறநிலையத் துறை சரி செய்ய வேண்டும் என பக்தர்கள் கோரிக்கை விடுக்கின்றனர். இதற்கிடையே காஞ்சிபுரம் வரதராஜ பெருமாள் கோவிலில் நேற்று காலை திருமலை திருப்பதி தேவஸ்தான செயல் அதிகாரி அனில்குமார் சிங்கால் சிறப்பு அதிகாரி தர்மாரெட்டி உள்ளிட்டோர் வந்து அத்தி வரதருக்கு பட்டு வஸ்திரம் சமர்ப்பித்தனர்.