நாமக்கல்: நாமக்கல், மோகனூர் பாலதண்டாயுதபாணி சுவாமி கோவில்களில், கந்தசஷ்டி, சூரசம்ஹார விழா கோலாகலமாக நடந்தது.

நாமக்கல்-மோகனூர் சாலையில், பாலதண்டாயுதபாணி சுவாமி கோவில் உள்ளது. இக்கோவிலில், ஆண்டு தோறும், கந்தசஷ்டி, சூரசம்ஹார விழா மற்றும் திருக்கல்யாண உற்சவ விழா கோலாகலமாக கொண்டாடப்படுகிறது. இந்த ஆண்டு விழா, நேற்று சிறப்பாக நடந்தது.  காலை, 6:30 மணிக்கு, கணபதி பூஜை, 7:00 மணிக்கு, சக்தி ஹோமம், சுப்ரமணியர் ஹோமம், சக்தி பூஜை, 8:30 மணிக்கு, சுவாமிக்கு, பால், தேன், பஞ்சாமிர்தம், திரவியம் உள்ளிட்ட பல்வேறு நறுமண பொருட்களால் சிறப்பு அபிஷேகம் நடந்தது. தொடர்ந்து, 10:30 மணிக்கு  தீபாராதனை நடந்தது. பக்தர்களுக்கு அன்னதானம் வழங்கப்பட்டது. மாலை, 6:00 மணிக்கு, சந்தனக்காப்பு அலங்காரத்தில் சுவாமி அருள்பாலித்தார். இரவு, 7:00 மணிக்கு, மின்விளக்குகளால் அலங்கரிக்கப்பட்ட ரதத்தில், முருகப்பெருமான் எழுந்தருளி, திருவீதி உலா வந்து  பக்தர்களுக்கு அருள்பாலித்தார்.

* மோகனூர், காந்தமலை பாலதண்டாயுதபாணி சுவாமி கோவிலில், நேற்று காலை முதல், சிறப்பு அபி ?ஷகம், ஆராதனை நடந்தது. வெள்ளிக் கவசத்தில் சுவாமி எழுந்தருளினார். பக்தர்களுக்கு பிரசாதம் வழங்கப்பட்டது. மாலை, 6:00 மணிக்கு, சுவாமி திருவீதி உலா  வந்து பக்தர்களுக்கு அருள்பாலித்தார். தொடர்ந்து, சூரனை வதம் செய்யும் நிகழ்ச்சியும் நடந்தது. ஏராளமான பக்தர்கள், சுவாமியை தரிசனம் செய்தனர். மாவட்டம் முழுவதும் முருகன் கோவில்களில் கந்தசஷ்டி சிறப்பாக கொண்டாடப்பட்டது.