லக்னோ: அயோத்தியில் கட்டப்படவுள்ள ராமர் கோவிலின் கட்டுமான பணிக்கு ஆலோசனை வழங்கும்படி, ஐ.ஐ.டி., எனப்படும், இந்திய தொழில்நுட்ப கல்வி நிறுவனத்தைச் சேர்ந்த இன்ஜினியர்களின் உதவியை, ராம ஜென்மபூமி அறக்கட்டளை நாடியுள்ளது.

உத்தர பிரதேச மாநிலம் அயோத்தியில், சர்ச்சைக்குரிய இடத்தில் ராமர் கோவில் கட்டுவதற்கு, உச்ச நீதிமன்றம் அனுமதி அளித்தது. இதையடுத்து, 67 ஏக்கர் பரப்பளவில், பிரமாண்டமாக ராமர் கோவில் கட்டப்படவுள்ளது. இதற்கான பணிகளை, ராம ஜென்மபூமி அறக்கட்டளை மேற்கொண்டு வருகிறது. கோவில் கட்டுமானப் பணிகள், வரும் ஏப்ரலில் துவங்கும் என எதிர்பார்க்கப்படுகிறது.

இதற்கிடையே, கட்டுமானப் பணிகளை எவ்வாறு மேற்கொள்வது என்பது குறித்து ஆலோசனை அளிக்கும்படி, டில்லி, கான்பூர், ஐ.ஐ.டி.,யில் உள்ள பிரபல இன்ஜினியர்களிடம், அறக்கட்டளை நிர்வாகிகள் உதவி கோரியுள்ளனர். இந்த, ஐ.ஐ.டி.,யைச் சேர்ந்த குறிப்பிட்ட சில இன்ஜினியர்கள், அறக்கட்டளை நிர்வாகிகளுக்கு ஆலோசனை அளித்து வருகின்றனர். மேலும், கட்டுமானப் பணிகளை மேற்கொள்வது குறித்து, எல் அண்ட் டி நிறுவனத்திடமும் ஆலோசனை கேட்கப்பட்டுள்ளது. இது குறித்த அதிகாரப்பூர்வ அறிவிப்பு விரைவில் வெளியாகலாம்.