தொண்டாமுத்தூர்: தொண்டாமுத்தூரில் நம்ம ஊரு பொங்கல் விழா, திருவிழா போல கொண்டாடப்பட்டது.

தமிழகம் முழுவதும், பா.ஜ., சார்பில், நம்ம ஊரு பொங்கல் விழா சிறப்பாக கொண்டாடப்பட்டு வருகிறது. தொண்டாமுத்தூர், மாரியம்மன் கோவில் மைதானத்தில், நம்ம ஊரு பொங்கல் விழா நேற்று கொண்டாடப்பட்டது. இவ்விழாவில், 108 பொங்கல் வைத்து, மாரியம்மனை வழிபட்டனர். பெண்களுக்கு, கோல போட்டிகள் நடத்தப்பட்டு, பரிசுகள் வழங்கப்பட்டது. மலைவாழ் மக்களின் பாரம்பரிய இசை நிகழ்ச்சி, குழு நடனம், கிராமிய பாடல்கள், சிறுவர், சிறுமியர்களின் நடனம், சொற்பொழிவு, மேளதாளங்கள் என, திருவிழா போல, நம்ம ஊரு பொங்கல் கொண்டாடப்பட்டது. மத்திய அரசின் திட்டங்கள் குறித்து விழிப்புணர்வு ஏற்படுத்தப்பட்டது. பிரதம மந்திரியின் ஐந்து லட்சம் ரூபாய் மதிப்பிலான காப்பீட்டு திட்டம், அனைவருக்கும் வீடு வழங்கும் திட்டம், தங்கமகள் திட்டம், பென்சன் திட்டம், இலவச குடிநீர் திட்டம், இலவச கேஸ் இணைப்பு திட்டம் உள்ளிட்டவைகளுக்கு, பொதுமக்களிடம் இருந்து விண்ணப்பங்கள் பெறப்பட்டது. இந்நிகழ்ச்சியில், பா.ஜ., தேசிய பொதுச்செயலாளர் ரவி, மாநில கலை பிரிவு செயலாளர் பெப்சி சிவா, மாநில துணை தலைவர்கள் அண்ணாமலை, கனகசபாபதி, மாநில பொதுச்செயலாளர் செல்வகுமார், மாநில விவசாய அணி தலைவர் நாகராஜ், மாவட்ட தலைவர் நந்தகுமார் உள்ளிட்ட பலர் கலந்து கொண்டனர்.