உத்தமபாளையம்: உத்தமபாளையம் காளாத்தீஸ்வரர் உடனுறை ஞானாம்பிகை கோயிலில் தினமும் நடக்கும் நான்கு கால பூஜைகளும், மங்கல வாத்தியம் மற்றும் மேளம் இல்லாமல் நடந்து வருகிறது என பக்தர்கள் வேதனை தெரிவிக்கின்றனர்.

உத்தமபாளையம் காளாத்தீஸ்வரர் உடனுறை ஞானாம்பிகை கோயில் ஆயிரம் ஆண்டு காலம் பழமையானது. வரலாற்று சிறப்புமிக்க இந்த கோயில் ராகு கேது பரிகார ஸ்தலமாக அதாவது கால சர்ப்ப தோஷ ஸ்தலமாகவும் விளங்குகின்றது. தென் காளஹஸ்தி என்றழைக்கப்படும் இந்த கோயிலில் தினமும் திருவனந்தல், கால சந்தி, சாயரட்சை, பள்ளியறை என நான்கு கால பூஜைகள் நடைபெறுகிறது. ஒவ்வொரு ஞாயிற்றுக் கிழமையும் 4.30 முதல் 6 மணிக்குள், ராகு காலத்தில் நடைபெறும் ராகு கேது தோஷ நிவர்த்தி பூஜைகளில், வெளி மாவட்டங்களை சேர்ந்த பக்தர்கள் திரளாக பங்கேற்கின்றனர். இந்த பூஜைகளின் போது மங்கல வாத்தியம் மற்றும் ராஜ மேளம் இசைக்கப்பட வேண்டும். அவ்வாறு இசைக்கப்படுவது ஆகம விதியாகும். ஆனால் கடந்த ஆறு மாதங்களாக மங்கல வாத்தியம் மற்றும் ராஜ மேளம் இசைக்கப்படவில்லை. காரணம் அந்த பணியில் இருந்தவர்கள் பணியில் இருந்து ஓய்வு பெற்றுள்ளனர். அதன் பின் புதிய பணியிடம் நிரப்பப்படவில்லை. இதனால் மங்கல வாத்தியம் மற்றும் ராஜ மேளம் இன்றி நான்கு கால பூஜைகளும், தோஷ நிவர்த்தி பூஜைகளும் நடந்து வருகிறது. ஆகம விதியை மீறி நடை பெறும் இந்த பூஜைகளை பற்றி பக்தர்கள் கவலையில் உள்ளனர். கோயிலின் செயல் அலுவலர் இதைப் பற்றி கண்டு கொள்ளவில்லை. இந்த பணியிடங்களை நிரப்ப உடனடி நடவடிக்கை எடுக்க வேண்டும். தேனி மாவட்ட ஹிந்து சமய அறநிலையத்துறையின் உதவி ஆணையர் அதற்கான உத்தரவுகளை பிறப்பிக்க வேண்டும்.