சூலூர்: "சென்னியாண்டவர் கோவிலில் தைப்பூச தேர் திருவிழாவுக்கு அனுமதி அளிக்க வேண்டும்," என, பா.ஜ., வேண்டுகோள் விடுத்துள்ளது.

கோவை வடக்கு மாவட்ட பா.ஜ., முன்னாள் பொதுச்செயலாளர் முருகேசன் கோவை இந்து சமய அறநிலையத்துறை இணை கமிஷனருக்கு அனுப்பியுள்ள மனு விபரம்: கருமத்தம்பட்டி அடுத்துள்ள விராலிக்காடு சென்னியாண்டவர் கோவில் பிரசித்தி பெற்றது. சுற்று வட்டார மக்கள், மாலை அணிந்து விரதம் இருந்து பாத யாத்திரை சென்று, தைப்பூச தேர் திருவிழாவில் பங்கேற்று வழிபடுவது வழக்கம். கடந்த இரு ஆண்டுகளாக, ஊரடங்கால் திரு விழா நடக்கவில்லை. இவ்வாண்டு தைப்பூச தேர் திருவிழா முறையான அனுமதி வழங்கி, விழா நடத்த தேவையான அனைத்து முன்னேற்பாடுகளையும் அரசு எடுக்க வேண்டும். விதிமுறைகளை பின்பற்றி பக்தர்கள் பங்கேற்று வழிபட தயாராக உள்ளனர். இவ்வாறு, அதில் கூறப்பட்டுள்ளது. இதேபோல், ஹிந்து முன்னணி திருப்பூர் மேற்கு மாவட்ட தலைவர் சுப்பிரமணியம், துறை அதிகாரியிடம் மனு அளித்துள்ளார்.