தொண்டாமுத்தூர்: பூண்டி வெள்ளியங்கிரி கோவிலில், பங்குனி உத்திர தேரோட்டம் நேற்று கோலாகலமாக நடந்தது. கோவை மேற்கு தொடர்ச்சி மலை அடிவாரத்தில் உள்ள, தென்கைலாயம் என அழைக்கப்படும் பூண்டி வெள்ளியங்கிரி ஆண்டவர் கோவிலில், பங்குனி உத்திர தேர்த்திருவிழா, கடந்த, 14ம் தேதி, கொடியேற்றத்துடன் துவங்கியது. 5 நாட்கள் நடைபெற்ற திருவிழாவில், நாள்தோறும் காலையும், மாலையும் வேள்வி பூஜை, திருவீதி உலா நடந்தது. நேற்று முன்தினம் இரவு, வெள்ளியங்கிரி ஆண்டவர், மனோன்மணி அம்மனுக்கு திருக்கல்யாண உற்சவம் நடந்தது.

நேற்று காலை, 8:00 மணிக்கு, நடராஜர் அபிஷேக தரிசன காட்சி நடந்தது. திருவிழாவின் முக்கிய நிகழ்வான, தேரோட்டம், நேற்று மாலை, 5:00 மணிக்கு நடந்தது‌. அலங்கரிக்கப்பட்ட தேரில், வெள்ளியங்கிரி ஆண்டவர், மனோன்மணி அம்மன் எழுந்தருளினர். பேரூர் ஆதீனம் மருதாச்சல அடிகளார், திருத்தேரை வடம் பிடித்து இழுத்து துவக்கி வைத்தார். பக்தர்கள் படைசூழ, திருத்தேரை வடம் பிடித்து, கோவிலை சுற்றி வந்து மீண்டும் நிலையில் நிறுத்தப்பட்டது. அதன்பின், மூலவருக்கு சிறப்பு அபிஷேகம் செய்யப்பட்டு, கொடிக்கம்பத்தில் இருந்து கொடி இறக்குதல் நிகழ்ச்சி நடந்தது.