மயிலாடுதுறை: மயிலாடுதுறை சிவபுரம் வேத சிவ ஆகம பாடசாலையில் உலக நன்மை வேண்டி தொடர் சிறப்பு யாகம் நடைபெறுகிறது.

மயிலாடுதுறை  மாயூரநாதர் தெற்கு வீதியில் சிவபுரம் வேத பாடசாலை அமைந்துள்ளது. இந்தப் பாடசாலையின் நிறுவனரும், தினமலர் ஆன்மீக கேள்விகளுக்கு வாரம்தோறும் பதில் அளிப்பவருமான சுவாமிநாத சிவாச்சாரியார் தலைமையில் நடைபெற்று வரும் இந்த பாடசாலையில் 80க்கும் மேற்பட்ட மாணவர்கள் வேதங்கள் பயின்று வருகின்றனர். இந்த பாடசாலையில்  உள்ள ஸ்ரீ மகா சதாசிவ பீடத்தில் கொரோனா நோய்த்தொற்று மற்றும் உலக நாடுகளிடையே நிலவிவரும் போர் பதற்றம் ஆகியவை நீங்கவும், மக்கள் அனைவரும் நோயற்ற வாழ்வும் நிறைவான செல்வமும் பெற்றிடவும், உலக நன்மை வேண்டியும் தொடர் சிறப்பு யாகம் நடைபெற்று வருகிறது.  சிறப்பு யாகத்தை முன்னிட்டு சிவன், பார்வதியை கடத்தில் ஆவாஹனம் செய்து வேத மந்திரங்கள் ஓத ஸ்ரீ ருத்ர மகா யாகம் மற்றும் லலிதா சஹஸ்ரநாம பாராயணம் ஆகியவை நடைபெறுகின்றன. தொடர்ச்சியாக கால நிர்ணயம் இன்றி தினமும் நடைபெறும் இந்த யாகத்தில் பக்தர்கள் கலந்துகொண்டு சிவபெருமானின் அருளை பெற வேண்டுமென ஸ்ரீ மகா சதாசிவ பீட நிர்வாகத்தினர்கேட்டுக்கொண்டுள்ளார்.

சிறப்பு யாகத்தில் கலந்து கொள்வதற்கு தொடர்பு கொள்ள வேண்டிய மொபைல் எண்: 8825863586, 9442485574