மதுரை : மதுரை கூடலழகர் பெருமாள் கோயில் யானை மதுரவல்லி 2016ல் உடல் நலக்குறைவால் இறந்த பின் வைக்கப்பட்ட பொம்மை யானை பக்தர்களை மகிழ்வித்து வருகிறது.

53 வயதான மதுரவல்லி 44 ஆண்டுகளாக ஆன்மிக சேவை செய்தது. சர்க்கரை நோய் பாதித்த நிலையில் கால்களில் புண் ஏற்பட்டது. அன்றைய வனஅலுவலர் நிஹார் ரஞ்சன் தலைமையில் கால்நடை டாக்டர்கள் சிகிச்சையளித்தும், பலனின்றி 2016ல் இறந்தது. கோயில் நந்தவனத்தில் அடக்கம் செய்யப்பட்டது. கோயிலுக்கு வரும் பக்தர்களும், குழந்தைகளும் மதுரவல்லி பிரிவால் மனவருத்தம் அடைந்தனர்.  இந்நிலையில் மதுரவல்லி இறந்த சில ஆண்டுகளுக்குப் பின், கோயிலில் நடைபெற்ற நவராத்திரி கொலுவுக்காக பெரிய யானை பொம்மை வாங்கி பெருமாள் சன்னதிக்கு செல்லும் வழியில் வைக்கப்பட்டது. பின்னர் அந்த நிறுவனமும் அதனை கோயிலுக்கே வழங்கிவிட்டது. பக்தர்கள் கூறியதாவது: விசேஷ நிகழ்வுகளில் வைக்கப்படும் வழக்கமான யானை பொம்மை தான்.

ஆனால் அது பெருமாள் கோயிலுக்குள் இருப்பதால், அச்சு அசலாக எங்களின் பிரியமான மதுரவல்லி போலவே இருக்கிறது. ஆசையுடன் பெரியவர்களும், குழந்தைகளும் அதன் அருகே நின்று போட்டோ எடுத்து செல்கின்றனர். ஆண்யானை பொம்மை என்றாலும் மதுரவல்லி இல்லாத குறையை இந்த மாதிரிவல்லி தீர்த்து வருகிறது, என்றனர்.