மதுரை : திருச்சி ஸ்ரீரங்கம் கோவிலைச் சுற்றிலும் உள்ள விதிமீறல் கட்டடங்களுக்கு எதிராக நடவடிக்கை கோரிய வழக்கில், தமிழக அரசு தரப்பில் அறிக்கை தாக்கல் செய்ய, உயர் நீதிமன்ற மதுரைக் கிளை நேற்று உத்தரவிட்டது.

கரூர் மாவட்டம், குளித்தலையைச் சேர்ந்த மகுடீஸ்வரன், உயர் நீதிமன்ற மதுரை கிளையில் தாக்கல் செய்த பொதுநல மனு: ஸ்ரீரங்கம் ரங்கநாதர் சுவாமி கோவிலைச் சுற்றிலும், 1 கி.மீ., சுற்றளவுக்கு, 9 மீ., உயரத்திற்கு மேல் கட்டடங்கள் அமைக்கக் கூடாது. இது அரசாணையில் தெளிவுபடுத்தப்பட்டுள்ளது.இதை மீறி பல்வேறு கட்டடங்கள் சட்டவிரோதமாக எழுப்பப்பட்டுள்ளன. இவை கோவில் கோபுரத்தை மறைக்கும் வகையில் உள்ளன.விதிமீறல் கட்டடங்களை அகற்றக் கோரி, தமிழக நகராட்சி நிர்வாகம் மற்றும் குடிநீர் வழங்கல்துறை செயலர், வீட்டு வசதி மற்றும் நகர்ப்புற வளர்ச்சித் துறை செயலர், அறநிலையத் துறை கமிஷனர், திருச்சி கலெக்டருக்கு மனு அனுப்பினேன்; நடவடிக்கை எடுக்க உத்தரவிட வேண்டும். இவ்வாறு மனுவில் கூறியிருந்தார். நீதிபதிகள் ஆர்.மகாதேவன், ஜெ.சத்திய நாராயண பிரசாத் அமர்வு அந்த மனுவை விசாரித்தது.தமிழக அரசுத் தரப்பில், விதிமீறல் கட்டடங்களின் உரிமையாளர்களுக்கு, நோட்டீஸ் அளித்து நடவடிக்கை எடுக்கப்பட்டுள்ளது என, தெரிவிக்கப்பட்டது.நீதிபதிகள், அரசு தரப்பில் இரண்டு வாரங்களில் அறிக்கை தாக்கல் செய்ய வேண்டும் என, உத்தரவிட்டனர்.