தொண்டாமுத்தூர்: புதுப்பாளையத்தில், தசரா விழாவையொட்டி, துர்க்கை சிலை செய்யப்பட்டுள்ளது.

நாடு முழுவதும், நவராத்திரி விழா வெகு விமர்சியாக கொண்டாடப்படுகிறது. வட இந்தியாவில், நவராத்திரி விழாவை, தசரா பண்டிகையாக பத்து நாட்கள் கொண்டாடுகின்றனர். இதில், துர்க்கை சிலை வைத்து பத்து நாட்களும் வழிபடுவது வழக்கம். தொண்டாமுத்தூர் அடுத்த புதுப்பாளையத்தில், ஆண்டுதோறும் துர்க்கை சிலை வைத்து தசரா பண்டிகை கொண்டாடப்பட்டு வருகிறது. இந்நிலையில், இந்தாண்டும் புதுப்பாளையத்தில் பொதுமக்கள் சார்பில், நவராத்திரி விழாவின் துவக்க நாளான நேற்று, அதிகாலை, 5:00 மணிக்கு, 6 அடி உயரமுள்ள துர்க்கை சிலை பிரதிஷ்டை செய்யப்பட்டது. உப தெய்வங்களாக, லட்சுமி, சரஸ்வதி, விநாயகர், முருகர் ஆகிய சிலைகளும் பிரதிஷ்டை செய்யப்பட்டுள்ளது. காலையும், மாலையும் சிறப்பு பூஜைகள் நடந்தது. தொண்டாமுத்தூர் வட்டாரத்தில் இங்கு மட்டுமே துர்க்கை சிலை பிரதிஷ்டை செய்யப்பட்டுள்ளதால், ஏராளமான பக்தர்கள் அம்மனை தரிசித்து சென்றனர். விழாவின் இறுதி நாளான விஜயதசமியன்று, துர்க்கை சிலை ஊர்வலமாக கொண்டு செல்லப்பட்டு நொய்யல் ஆற்றில் விசர்ஜனம் செய்யப்படவுள்ளது.