சூலூர்: சூலூர் வட்டார முருகன் கோவில்களில் திருக்கல்யாண உற்சவம் நேற்று கோலாகலமாக நடந்தது.

சூலூர் வட்டார முருகன் கோவில்களில் கடந்த, 25 ம்தேதி கந்த சஷ்டி விழா துவங்கியது. தினமும் சத்ரு சம்ஹார ஹோமம், அபிஷேக, அலங்கார பூஜைகள் நடந்தன. கருமத்தம்பட்டி சென்னியாண்டவர் கோவில், கண்ணம்பாளையம் பழனி ஆண்டவர் கோவில்களில் நேற்று முன்தினம் சூரசம்ஹார விழா நடந்தது. ஆயிரக்கணக்கான பக்தர்கள் பங்கேற்றனர். நேற்று பல்வேறு கோவில்களில் திருக்கல்யாண உற்சவம் நடந்தது. பொன்னாண்டாம்பாளையம் சென்னியாண்டவர் கோவிலில் புதிதாக வடிவமைக்கப்பட்ட உற்சவ மூர்த்திக்கு அபிஷேக, அலங்கார பூஜைகள் நடந்தன. தொடர்ந்து கல்யாண உற்சவம் நடந்தது. கருமத்தம்பட்டி சென்னியாண்டவர் கோவிலில் திருக்கல்யாண உற்சவம் முடிந்து திருவீதி உலா நடந்தது. சூலூர் பழனியாண்டவர் கோவில், வேல்முருகன் கோவில்களில் திருக்கல்யாண உற்சவம் நேற்று நடந்தது.