பழநி: பழநி மலைக்கோயிலில் திருக்கார்த்திகை விழா அன்று மலைக் கோயிலுக்கு ஒரு வழிப்பாதையில் பக்தர்கள் செல்ல வேண்டும். தங்க ரதம் புறப்பாடு நடைபெறாது என கோயில் நிர்வாகம் தெரிவித்துள்ளது.

பழநி மலைக்கோயிலில் திருக்கார்த்திகை விழா (நவ.30) முதல் டிச.,6 வரை நடைபெற்று வருகிறது. திருக்கார்த்திகை தினமான டிச.6.,அதிகாலை 4:00 மணிக்கு விஸ்வரூப தரிசனம் 4:30 மணிக்கு விழா பூஜை, மாலை 4:00 மணிக்கு சாயரட்சை பூஜையும், மாலை 4:45 மணிக்கு சின்ன குமாரசுவாமி தங்க மயில் வாகனத்தில் எழுந்தருளி யாகசாலை, பிரகாரம் வலம் வருவார். அதன்பின் தீபமேற்றும் மண்டபத்திற்கு எழுந்தருள்வார். பிரகாரங்களில் தீபம் வைத்தல் நடைபெறும். மாலை 6:00 மணிக்கு தீப ஸ்தம்பத்தில் மகாதீபம் ஏற்றும் நிகழ்வு நடைபெறும். திருக்கார்த்திகை தினத்தில் பக்தர்கள் வருகை அதிகம் இருக்கும் என கருதி பாதுகாப்பு காரணமாக, மலைக் கோயிலுக்கு பக்தர்கள் செல்ல குடமுழுக்கு நினைவரங்கம், வழியாக மேலே செல்லவும், படிப்பாதை வழியாக கீழே இறங்கி செல்லவும் பயன்படுத்த வேண்டும். அன்றைய தினம் மலைக்கோயில் செல்லும் பாதை ஒரு வழி பாதையாக பக்தர்கள் பயன்படுத்திக் கொள்ள வேண்டும். மேலும் பக்தர்கள் கூட்டத்தை ஒழுங்குபடுத்த பிற்பகல் 2:00 மணி அளவில் குடமுழுக்கு நினைவரங்கம், தற்காலிகமாக அடைக்கப்படும். அதன் பின் மாலை 6:00 மணிக்கு மேல் பக்தர்கள் அனுமதிக்கப்படுவர். மலைக்கோயில் செல்ல பயன்படும் வின்ச், ரோப் கார் வழக்கம் போல் செயல்படும். தங்கரத புறப்பாடு நிறுத்தம்: கார்த்திகை தீபம் ஏற்றும் நிகழ்வை முன்னிட்டு தீபத்திருநாளான டிச.,6 அன்று மட்டும் தங்க ரதத்தில் சுவாமி புறப்பாடு நடைபெறாது. மலைக்கோயிலில் மகாதீபம் ஏற்றிய பின் திருஆவினன்குடி குழந்தை வேலாயுத சுவாமி கோயில், பெரிய நாயகி அம்மன் கோயில் ஆகியவற்றில் கார்த்திகை தீபம் ஏற்றப்படும் என கோயில் இணை ஆணையர் நடராஜன் தெரிவித்துள்ளார்.