ஸ்ரீவில்லிபுத்தூர்: சதுரகிரி சுந்தர மகாலிங்கம் கோயிலில் கார்த்திகை மாத பிரதோஷ வழிபாடு பக்தர்கள் இன்றி நடந்தது.

மழையை பொறுத்து பக்தர்கள் சுவாமி தரிசனம் செய்ய அனுமதிக்கப்படுவார்கள் என வனத்துறை நேற்று முன்தினம் அறிவித்திருந்த நிலையில், நேற்று அதிகாலையில் தாணிப்பாறையில் லேசான சாரல் மழை பெய்ததால் ஓடைகளில் நீர்வரத்து காணப்பட்டது.  இந்நிலையில் நேற்று காலை 6:00 மணிக்கு தாணிப்பாறைக்கு மிகவும் குறைந்தளவில் பக்தர்களே வந்திருந்தனர். அப்போது லேசான சாரல் மழை பெய்ததால் பக்தர்கள் மலையேற அனுமதிக்கப்படவில்லை. இதனால் வந்திருந்த பக்தர்கள் வனத்துறை கேட் முன்பு சூடமேற்றி கோயிலை நோக்கி வணங்கி, ஏமாற்றத்துடன் திரும்பி சென்றனர். நேற்று மாலை 4:30 மணிக்கு மேல் சுந்தர மகாலிங்கம், சந்தனமகாலிங்கம், சுந்தரமூர்த்தி சுவாமிகளுக்கு பிரதோஷ வழிபாடு பூஜைகளை கோயில் பூசாரிகள் செய்தனர். ஏற்பாடுகளை அறங்காவலர் பெரியசாமி, செயல் அலுவலர் நாகராஜன், கோயில் ஊழியர்கள் செய்திருந்தனர். நாளை (டிச.7) காலையில் மழையின் சூழலை பொறுத்தே, கார்த்திகை மாத பவுர்ணமி வழிபாட்டிற்கு பக்தர்கள் மலையேற அனுமதிக்கப்படுவார்கள் என வனத்துறையினர் மீண்டும் தெரிவித்துள்ளனர்.