திருச்செந்துார்: திருச்செந்துார் வெயிலுகந்த அம்மன் கோயில் மாசித் திருவிழா தேரோட்டம் நேற்று நடந்தது. திருச்செந்துார் சுப்பிரமணிய சுவாமி கோயிலுடன் இணைந்த உப
கோயிலான வெயிலுகந்த அம்மன் கோயில் மாசித் திருவிழா கடந்த13ம் தேதி துவங்கியது. விழா நாட்களில் தினமும் காலை மற்றும் மாலையில் அம்மன் பல்வேறு வாகனங்களில் எழுந்தருளி வீதி உலா நடந்தது. இத்திருவிழாவின் 10ம் நாளான நேற்று காலை சிகர நிகழ்ச்சியான தேரோட்டம் நடந்தது. இதையொட்டி அதிகாலை கோயில் நடைதிறக்கப்பட்டு அம்மனுக்கு சிறப்பு அபிஷேகம், அலங்காரமாகி தீபாராதனை நடந்தது. பின்னர் அம்மன் தேரில் எழுந்தருளினார். காலை 6.10மணிக்கு தேர் நிலையில் இருந்து புறப்பட்டு ரதவீதிகள் சுற்றி மீண்டும் 7:00 மணிக்கு நிலையை வந்து சேர்ந்தது. இதில் திரளான பக்தர்கள் கலந்து கொண்டு தேரை வடம் பிடித்து இழுத்தனர். ஏற்பாடுகளை கோயில் அறங்காவலர் குழு தலைவர் அருள்முருகன், இணை ஆணையர் கார்த்திக் மற்றும் கோயில் அறங்காவலர் குழுவினர் செய்திருந்தனர்.