ராமேஸ்வரம்: ராமேஸ்வரம் முதல் காசிக்கு இலவச யாத்திரை பயணமாக ராமேஸ்வரத்தில் இருந்து 66 பக்தர்களை ஹிந்து அறநிலைத்துறையினர் அழைத்து சென்றனர்.

தமிழக அரசு ஏற்பாட்டில் ரூ. 50 லட்சம் செலவில் ராமேஸ்வரம் ராமநாதசுவாமி கோயில் முதல் காசி விஸ்வநாதர்சுவாமி கோயிலில் தரிசிக்க 200 பக்தர்களை தேர்வு செய்தது. இதில் முதல்கட்டமாக  தென் மாவட்டத்தை சேர்ந்த 66 பக்தர்களை காசிக்கு அழைத்து செல்ல நேற்று ராமேஸ்வரம் கோயிலுக்கு வரவழைக்கப்பட்டனர். இவர்கள் ராமேஸ்வரம் கோயிலில் புனித நீராடி சுவாமி தரிசனம் செய்தனர்.  பின் நேற்று மாலை 5 மணிக்கு ஒரு பஸ், ஒரு வேனில் 66 பேரும் புறப்பட்டு விழுப்புரம் சென்றனர். இவர்களை கோயில் துணை ஆணையர் மாரியப்பன் வழியனுப்பினார். இன்று ( பிப்., 23) காலை 10:20  மணிக்கு காசிக்கு செல்லும் ரயிலில் பக்தர்கள் பயணிக்கின்றனர். இவர்கள் பிப்., 25, 26ல் காசியில் சுவாமி தரிசனம் செய்ததும், பிப்., 26 இரவு அங்கிருந்து ரயிலில் புறப்பட்டு பிப்., 28 இரவு விழுப்புரம்  வருவார்கள். பின் அங்கிருந்து வாகனத்தில் புறப்பட்டு பிப்., 29ல் ராமேஸ்வரம் வந்து, கோயிலில் புனித நீராடி சுவாமி தரிசனம் செய்ததும், சொந்த ஊருக்கு திரும்பி செல்வார்கள். இதனைத்தொடர்ந்து 2ம்  கட்டமாக மார்ச் 1ல், 3ம் கட்டாக மார்ச் 8ல் ராமேஸ்வரத்தில் இருந்து காசிக்கு மீதமுள்ள 134 பக்தர்கள் செல்ல உள்ளார்கள்.