மேல்மருவத்துார்: மேல்மருவத்துார் ஆதிபராசக்தி சித்தர் பீடம், ஆன்மிக குரு பங்காரு அடிகளாரின் 83வது பிறந்த நாள் விழாவையொட்டி, ஆதிபராசக்தி அம்மனுக்கு சிறப்பு பூஜையுடன், உலக நலன், இயற்கை வளம் செழிக்க, கலச விளக்கு வேள்வி பூஜை 28ம் தேதி நடந்தது.

இதைத் தொடர்ந்து, மங்கல இசையுடன், ஆதிபராசக்தி அம்மனுக்கு சிறப்பு அபிஷேகம் நேற்று நடந்தது. சித்தர் பீடம் வந்த பங்காரு அடிகளாருக்கு, பாத பூஜை செய்து, செவ்வாடை பக்தர்கள் வழிபட்டனர். இதில், ஏராளமான பக்தர்கள் பங்கேற்றனர். அதன்பின், இன்று 2ம் தேதி, மக்கள் நலப்பணி விழா மற்றும் பங்காரு அடிகளார் பிறந்த நாள் விழா மலர் வெளியீட்டு விழா நடைபெற உள்ளது. இதில், சென்னை உயர் நீதிமன்ற நீதிபதி ஆர்.எம்.டி.தீக்காராமன் உள்ளிட்ட பலர் பங்கேற்க உள்ளனர். அதன்பின், 3ம் தேதி, காலை 9:00 மணிக்கு, அடிகளார் வீட்டில் இருந்து சித்தர் பீடத்திற்கு, மலர் அலங்கார ரதத்தில் ஊர்வலமாக, செவ்வாடை பக்தர்கள் அழைத்து வருவர். சித்தர் பீடம் வந்த பிறகு, அடிகளார், பக்தர்களுக்கு ஆசி வழங்குவார். சென்னை ரேவதி கிருஷ்ணா குழுவினர், வீணை இசை நடத்துவர். விழாவிற்கான ஏற்பாடுகளை, ஆதிபராசக்தி ஆன்மிக இயக்க தலைவர் லட்சுமி பங்காரு அடிகளார் தலைமையில், துணை தலைவர் ஸ்ரீதேவி ரமேஷ், வழக்கறிஞர் அகத்தியன் மற்றும் சேலம், நாமக்கல் மாவட்ட ஆதிபராசக்தி இயக்க நிர்வாகிகள் செய்து வருகின்றனர்.