செஞ்சி: செஞ்சி திருவண்ணாமலை சாலை இரட்டை பிள்ளையார் கோவில் மகா கும்பாபிஷேகத்தில் ஏராளமான பக்தர்கள் கலந்து கொண்டனர்.

செஞ்சியில் திருவண்ணாமலை சாலையில் அமைந்துள்ள இரட்டை பிள்ளையார், வலம்புரி விநாயகர் கோவில் திருப்பணிகள் செய்து மகா கும்பாபிஷேகம் நடந்தது. இதை முன்னிட்டு கடந்த 9ம் தேதி காலை 8 மணிக்கு மூத்த பிள்ளையார் வேள்வியும், 9 மணிக்கு பேரொளி வழிபாடும், 10.30 மணிக்கு சாமி கரிக்கோல ஊர்வலமும், மாலை 4 மணிக்கு நலத்தேவர் வழிபாடும், இரவு 8 மணிக்கு முதல் கால வேள்வியும், தொடர்ந்து அஷ்டபந்தன மருந்து சாற்றுதலும் நடந்தது. இன்று காலை 6 மணிக்கு திருப்பள்ளி எழுட்சியும், 7.30 மணிக்கு இரண்டாம் கால வேள்வியும், 8 மணிக்கு மகா பூர்ணாஹூதியும் 8.30 மணிக்கு மகா கும்பாபிஷேகமும் நடந்தது. தொடர்ந்து 9 மணிக்கு மகா அபிஷேகமும் 9.30 மணிக்கு மகா தீபாராதனையும் நடந்தது. பக்தர்களுக்கு அன்னதானம் வழங்கினர். செஞ்சி ஒன்றிய சேர்மன் விஜயகுமார், பேரூராட்சி சேர்மன் மொக்தியார் மஸ்தான், மாவட்ட கவுன்சிலர் அரங்கஏழுமலை, திருப்பணிக்குழு தலைவர் செல்வராஜ் மற்றும் திரளான பக்தர்கள் கலந்து கொண்டனர்.