உடம்பில் ஒரு கட்டி வந்து ரொம்ப கஷ்டப்படுத்துகிறது. அதன் மேலே சரியான சூட்டிலே ஜலம் விட்டால், ஒத்தடம் கொடுத்தால் கஷ்டம் அப்போதைக்காவது மறைந்து போகிறது. எதம்...மா இருக்கு என்கிறோம். அந்த எதம் என்பது சம்ஸ்கிருதத்தில் உள்ள ஹிதம் தான்.  பாபம் நம்மை சம்சாரத்தில் கட்டி போட்டுக் கஷ்டப்படுத்துகிறது. இதுவும் ஒரு கட்டி. பாபம் தீரப் புண்ணியம் பண்ண வேண்டும். அந்தப் புண்ணியம் சாதாரணமாக நமக்கு எரிச்சல் தரும் மருந்தாகவே இருக்கும். அப்படி இல்லாமல் அதையும் சவுக்கியம் தரும் ஒத்தடமாக்கிக் கொடுப்பவர் தான் நமக்கு ஹிதம் செய்கிற, ஹிதமாக இருக்கும் குரு. சத்தியம் நல்லது. ஆனால், அது அநேகமாக மனசுக்குப் பிடிக்காது. சத்தியத்தையும் ஹிதமாகச் சொல்லி பிடிக்கிற மாதிரி பண்ணனும். ஸத்யம் ப்ரூயாத், ப்ரியம் ப்ரூயாத் என்று ஸ்மிருதியில் மநு சொல்கிறார். திருவள்ளுவரும்,வாய்மை எனப்படுவது யாதெனின் யாதொன்றும் தீமை இலாத சொலல்  என்கிறார். இதில் தீமை இலாத அதாவது ஹிதமாக! ஹிதோபதேசம் என்றொரு புஸ்தகம் உண்டு. உபதேசம் என்றால் சாதாரணமாக யாருக்குமே பிடிக்காது. குழந்தைகளுக்கு நீதிபோதனை பிடிக்கும் விதத்தில் மிருகம், பறவைகளைக் கூட கதாபாத்திரங்களாக்கி விஷ்ணுசர்மா பஞ்சதந்திரம் எழுதினார். அதையே பின்பற்றி நாராயணர் என்ற வங்காளியர் எழுதினது தான் ஹிதோபதேசம்.
-சொல்கிறார் காஞ்சி பெரியவர்.