மதுரை அழகர்மலை சோலைமலை முருகன் கோயிலில் ஆண்டுதோறும் நடைபெறும் கந்த சஷ்டி பெருந்திருவிழா, இந்த ஆண்டு நேற்று நவ., 10ம் தேதி காப்புக் கட்டுதலுடன் கோலாகலமாகத் தொடங்கியது.

காலை விக்னேஷ்வர பூஜை, யாகசாலை பூஜைகள், வேத மந்திரங்கள் முழங்க முருகப்பெருமானுக்குக் காப்பு கட்டப்பட்டது. ஏராளமான பக்தர்கள் காப்புக் கட்டி விரதத்தைத் தொடங்கினர். தொடர்ந்து சண்முகார்ச்சனை, மகா அபிஷேகம், 16 வகையான அபிஷேகங்கள், தீபாராதனை நடைபெற்றன. விழாவையொட்டி தினமும் முருகப்பெருமான் அன்னம், காமதேனு, யானை, ஆட்டுக்கிடாய், சப்பரம் உள்ளிட்ட பல்வேறு வாகனங்களில் எழுந்தருளி வீதி உலா வருகிறார். நவம்பர் 15-ம் தேதி முக்கிய நிகழ்வான சூரசம்ஹாரம் நடைபெறுகிறது. அன்று மாலை 3.45 மணிக்கு வேல் வாங்குதலும், 4.15 மணிக்கு வெள்ளி மயில் வாகனத்தில் சுவாமி புறப்பாடும் நடைபெறும். மாலை 5.30 மணிக்கு கஜமுகாசுரன், சிங்கமுகாசுரன் மற்றும் பத்மாசுரன் ஆகியோரை முருகப்பெருமான் சம்ஹாரம் செய்யும் நிகழ்ச்சி நடைபெறுகிறது. தொடர்ந்து நவம்பர் 16-ம் தேதி பகல் 12.20 மணிக்கு வள்ளி, தெய்வானை சமேத சுப்பிரமணிய சுவாமிக்கு திருக்கல்யாண வைபவம் நடைபெறுகிறது. மாலையில் ஊஞ்சல் சேவை, மஞ்சள் நீர் உற்சவத்துடன் கந்த சஷ்டி பெருந்திருவிழா நிறைவு பெறுகிறது. விழாவிற்கான ஏற்பாடுகளை கோயில் இணை ஆணையர் பொன் சுவாமிநாதன் மற்றும் கோயில் பணியாளர்கள் செய்து வருகின்றனர்.