தமிழகத்தில் உள்ள பிரசித்தி பெற்ற கோவில்களில் ஒன்றான திருவண்ணாமலை அருணாசலேஸ்வரர் கோவிலுக்கு, தினமும் ஆயிரக்கணக்கான பக்தர்களும், பவுர்ணமி நாட்களில் லட்சக்கணக்கான பக்தர்களும் வருகின்றனர். கோவிலுக்கு சென்று தரிசனம் செய்ய இயலாத பக்தர்களின் வசதிக்காக, உற்சவமூர்த்திக்கு நடக்கும் சிறப்பு வழிபாடுகளை நேரடியாக காண, அறநிலையத்துறை ஏற்பாடு செய்துள்ளது. இதன்படி நடை திறப்பு முதல் நடையடைப்பு வரை, அருணாசலேஸ்வரர், உண்ணாமுலையம்மன் உற்சவமூர்த்திக்கு நடக்கும் அனைத்து வழிபாடு, பூஜை, அலங்காரத்தை நேரடியாக ‘யூ–டியூப்’ மூலம் ஒளிபரப்ப ஏற்பாடு செய்யப்பட்டுள்ளது.

இதுகுறித்து கோவில் இணை ஆணையர் குமரேசன் கூறியதாவது: அருணாசலேஸ்வரர் கோவிலில், உற்சவ மூர்த்தி வழிபாடுகளை தரிசனம் செய்ய விரும்பும் பக்தர்கள், https://www.youtube.com/@arunachaleswarar/streams என்ற இணையதள முகவரி வழியாக காணலாம். மேலும், தமிழ்நாட்டின் பிரசித்தி பெற்ற கோவில்களின் தகவல் மற்றும் சேவைகளை எளிதில் பெற உருவாக்கப்பட்டுள்ள, Thirukkoil என்ற ‘மொபைல் ஆப்’  மூலமும் காணும் வசதி செய்யப்பட்டுள்ளது. உற்சவமூர்த்தி வழிபாடு நேரடி ஒளிபரப்புக்கு கிடைக்கும் வரவேற்பை தொடர்ந்து, கோவில் விழாக்கள் அனைத்தையும், நேரடி ஒளிபரப்பு செய்வதற்கான முயற்சிகளை அறநிலையத்துறை மேற்கொள்ளும். இவ்வாறு அவர் கூறினார்.