அருப்புக்கோட்டை: அருப்புக்கோட்டை மீனாட்சி சொக்கநாதர் கோவில் பிரம்மோற்சவ விழா கொடியேற்றத்துடன் துவங்கியது. அருப்புக்கோட்டை சொக்கலிங்கபுரம் சொக்கலிங்கபுரத்தில் இந்து சமயம் அறநிலையத்துறைக்கு பாத்தியப்பட்ட மீனாட்சி சொக்கநாதர் கோயிலில் ஆணி பிரம்மோற்சவ விழா நேற்று கொடியேற்றத்துடன் துவங்கியது. சாமிக்கு சிறப்பு அபிஷேக ஆராதனை செய்த பின் கொடிக்கு பூஜை செய்யப்பட்டு கொடியேற்றம் நடந்தது. முன்னாள் ஊராட்சி ஒன்றிய தலைவர் சுப்பாராஜ், மாவட்ட அறங்காவலர் குழு தலைவர் விஜயகுமார், நகராட்சி தலைவர் சுந்தரலட்சுமி, துணைத்தலைவர் பழனிச்சாமி, செயல் அலுவலர் தேவி கலந்து கொண்டனர். தொடர்ந்து 12 நாட்கள் நடக்கும் விழாவில் தினமும் ஒவ்வொரு மண்டகப்படியாரின் பூஜை நடக்கும். இந்த மாதம் 30 ம் தேதி திருக்கல்யாணமும், ஜூலை 1ம் தேதி மாலை 4.30 மணிக்கு திருத்தேர் வீதி உலாவும் நடைபெறும். ஏற்பாடுகளை கோவில் நிர்வாகத்தினர் செய்து வருகின்றனர்.