செந்துறை; நத்தம் அருகே கோட்டைப்பட்டி பொன்னர், சங்கர்,வீர மகாமுனி சுவாமி கோவில்களில் 21 ஆண்டுகளுக்கு பின் நடந்த புரவி எடுப்பு திருவிழாவில் ஏராளமான பக்தர்கள் கலந்து கொண்டு சாமி தரிசனம் செய்தனர்.

நத்தம் கோட்டைப்பட்டியில் உள்ள பொன்னர், சங்கர், வீர மகாமுனி சாமி கோவில்களில் 21 ஆண்டுகளுக்குப் பின் ஆடி மாத புறவி எடுப்பு திருவிழா நடத்த கிராம மக்கள் முடிவு செய்தனர். விழாவையொட்டி பிடி மண் எடுத்து சிலைகள் செய்யும் பணி தொடங்கியது. தொடர்ந்து நேற்று பொன்னர், சங்கர், வீர மகாமுனிசுவாமிகள் புரவி எடுப்பு திருவிழா நடந்தது.முன்னதாக கோட்டைப்பட்டி, வேப்பம்பட்டி ஊர்மந்தை முத்தாலம்மன் கோவிலில் இருந்து பிரதிஷ்டை செய்யப்பட்ட சுவாமி சிலைகள் வானவேடிக்கைகளுடன் ஊர்வலமாக மந்தைக்கு எடுத்து வரப்பட்டு சிறப்பு பூஜைகள் செய்து கண் திறக்கப்பட்டது. பின்னர் பொன்னர்சங்கர்,வீர மகாமுனிசுவாமிக்கு சிறப்பு அபிஷேகமும், தீபாராதனைகளும் நடந்தது. கன்னிமார், கருப்பசாமி மற்றும் குதிரை, காளை, மதிலை சிலைகள் ஊர்மந்தையில் இருந்து ஊர்வலமாக கோவிலுக்கு எடுத்துவரப்பட்டது. இதில் சுற்றுவட்டாரங்களில் இருந்து ஏராளமான பக்தர்கள் கலந்து கொண்டு சாமி தரிசனம் செய்தனர். திருவிழாவிற்கான ஏற்பாடுகளை கோட்டைப்பட்டி,வேப்பம்பட்டி ஊர் பொதுமக்கள், கோவில் நிர்வாகிகள் செய்திருந்தனர்.