மயிலாடுதுறை; அயோத்தி ராமர் கோவில் கும்பாபிஷேகத்தை முன்னிட்டு ஞானபுரீ கோவிலில் 22ம் தேதி கோதண்டராமருக்கு சிறப்பு பூஜைகள், பஜனை, கூட்டு வழிபாடு மற்றும் விளக்கு பூஜை நடைபெற உள்ளன.

திருவாரூர் மாவட்டம் நீடாமங்கலம் அருகேயுள்ள திருவோணமங்கலம் ஞானபுரீ சித்ரகூட சேத்ரத்தில் ஸ்ரீ சங்கடஹர மங்கல மாருதி ஆஞ்சநேயர் கோயில் அமைந்துள்ளது. இக்கோவிலில் லட்சுமி நரசிம்மர் மற்றும் சீதா, லட்சுமண, ஹனுமத் சமேத கோதண்டராமர் சுவாமி தனித்தனி சன்னதிகளில் எழுந்தருளியுள்ளனர். இங்கு 33 அடி உயரம் கொண்ட விஸ்வரூப ஸ்ரீ சங்கடஹர மங்கல மாருதி ஆஞ்சநேயர் சுவாமி சஞ்சீவி மூலிகைகளுடன் பக்தர்களுக்கு அருள் பாலிப்பது உலகில் வேறு எங்கும் இல்லாத சிறப்பு. இத்தகைய சிறப்புமிக்க கோவிலில் வரும் 22ம் தேதி அயோத்தி ராமர் கோவில் கும்பாபிஷேகத்தை முன்னிட்டு ஸ்ரீ ஜகத்குரு பத்ரி சங்கராச்சாரியார் ஸ்ரீ  சேத்திர சகடபுர ஸ்ரீவித்யா பீடாதீஸ்வர ஸ்ரீ வித்யாபிரவ ஸ்ரீஸ்ரீ கிருஷ்ணானந்த தீர்த்த மஹா சுவாமிகளின் பரிபூரண ஆசீர்வாதங்களுடன் காலை 7 மணிக்கு சீதா லட்சுமண ஹனுமத் சமேத ஸ்ரீ கோதண்ட ராமசுவாமிக்கு சிறப்பு அபிஷேக, ஆராதனையும், அதனைத் தொடர்ந்து அகண்ட நாம பஜனை மற்றும் கூட்டு வழிபாடு நடைபெற உள்ளது. மாலை 6 மணிக்கு திருவிளக்கு பூஜையும், இரவு 7 மணிக்கு வெள்ளி ரத உற்சவமும் நடைபெறுகிறது. சிறப்பு பூஜைகள் மற்றும் திருவிளக்கு பூஜை, வெள்ளி ரத உற்சவத்தில் திரளான பக்தர்கள் கலந்துகொண்டு திருவருளையும், குருவருளையும் பெற வேண்டுமென கோவில் நிர்வாகம் சார்பில் தெரிவிக்கப்பட்டுள்ளது. நிகழ்ச்சிக்கான ஏற்பாடுகளை கோவில் தர்மாதிகாரி ரமணி அண்ணா, திருமடத்தின் ஸ்ரீ காரியம் சந்திரமவுலீஸ்வரர் ஆகியோர் செய்துள்ளனர்.