திருப்பூர்; ஸ்ரீசத்ய சாய்பாபாவின் 99வது பிறந்த நாள் விழா, திருப்பூரில் கடந்த 19ம் தேதி துவங்கியது. நாளை 23ம் தேதி வரை நடைபெற உள்ளது.

திருப்பூர் மாவட்ட, ஸ்ரீசத்ய சாய்பாபா சேவை அமைப்பு சார்பில், ஸ்ரீசத்ய சாய்பாபாவின், 99வது பிறந்த நாள் விழா கொண்டாட்டம் கடந்த, 19ம் தேதி துவங்கியது. இதையொட்டி நாளை, 23ம் தேதி வரை தினமும் சிறப்பு நகர சங்கீர்த்தனம் நடைபெறுகிறது. பி.என்., ரோட்டில் உள்ள ஸ்ரீசத்ய சாய் ஆன்மிக மையத்தில், கடந்த, 19ம் தேதி நாம சங்கீர்த்தனம், சாய் மந்திரில் உழவாரப் பணி மற்றும் மகளிர்க்கான சிறப்பு யோகாசன பயிற்சி, சிறப்பு ஆலோசனை மற்றும் மங்கள ஆரத்தி ஆகியன நடந்தது.

நேற்று முன்தினம் திருவிளக்கு பூஜை நடைபெற்றது. இதில் பாலவிகாஸ் பள்ளி ஆசிரியர்கள் மற்றும் மகளிர் கலந்து கொண்டு வழிபாடு செய்தனர். சாய் பஜன் மற்றும் ஆசிரியர் ரம்யாவின் சொற்பொழிவு ஆகியன நடந்தது. நேற்று இளைஞர்கள் பங்கேற்ற சிறப்பு பஜன் மற்றும் சொற்பொழிவு ஆகியன நடந்தது. இதில், லிங்கராஜன் மற்றும் நாராயண மூர்த்தி ஆகியோர் பேசினர். விழாவில், இன்று காலை 9:30 மணிக்கு சாய் பஜன் நிகழ்ச்சியும் தொடர்ந்து நாராயண சேவைக்கான ஆயத்தப் பணிகளும் நடைபெற்றது. நாளை அதிகாலை 5:00 மணிக்கு ஓம்காரம், நகர சங்கீர்த்தனம், கணபதி ஹோமம், பிரசாந்தி கொடியேற்றம் மற்றும் சாய் பஜன் நடைபெறும். காலை 11:00 மணி முதல் சிறப்பு நாராயண சேவையும், மாலை 4:45 மணிக்கு, 1008 சகஸ்ர நாம பாராயணம்; ஸ்வாமி அழைப்பு, சாய் பஜன் மற்றும் சொற்பொழிவு நடைபெறுகிறது. தொடர்ந்து, ஊஞ்சல் உற்சவம், மகா மங்கள ஆரத்தியும் நடக்கிறது. வரும், 24ம் தேதி, காலை 9:00 மணிக்கு அகண்ட நாம பஜன் மற்றும் ரத்த தான முகாம் ஆகியன நடைபெறுகிறது. விழா ஏற்பாடுகளை திருப்பூர் மாவட்ட ஸ்ரீசத்ய சாய் சேவா அமைப்பினர் செய்துள்ளனர்.