சபரிமலை; சபரிமலை சன்னிதானத்தில் புதிய நவக்கிரக கோயில் பிரதிஷ்டைக்காக வரும் ஜூலை 11- ம் தேதி மாலை நடை திறக்கிறது.

சபரிமலை மாளிகைபுறம் கோயில் கோயிலின் இடது புறம் உள்ள நவக்கிரக மண்டபத்தை மாற்றி வசதியான மற்றொரு இடத்தில் அமைக்க வேண்டும் என்று தேவப்பிரசன்னத்தில் கூறப்பட்டதை தொடர்ந்து புதிய கோயில் அமைக்கப்பட்டுள்ளது. இதற்கான பிரதிஷ்டை ஜூலை 13- ம் தேதி நடைபெறுகிறது. இதற்காக சபரிமலை நடை 11-ம் தேதி மாலை 5:00 மணிக்கு திறக்கும். தொடர்ந்து தந்திரி கண்டரரு ராஜீவரரு தலைமையில் சுத்திக்கிரியைகள் நடைபெறும். ஜூலை 12- ம் தேதி பிரதிஷ்டைக்கு முன்னோடியான பூஜைகள் நடைபெறும். 13 - ம் தேதி அதிகாலை கணபதி ஹோமம், உஷ பூஜை, மரப்பாணி ஆகிய சடங்குகளுக்கு பின்னர் காலை 11 முதல் 12 மணிக்கு இடையிலான முகூர்த்தத்தில் நவக்கிரக கோயில் பிரதிஷ்டை நடைபெறும்.அன்று இரவு சபரிமலை நடை அடைக்கப்படும். அதன் பின்னர்ஜூலை 16- ம் தேதி மாலை ஆடி மாத பூஜை களுக்காக நடை திறக்கிறது. ஜூலை 11 முதல் 13-ம் தேதி வரை சபரிமலையில் தரிசனத்திற்கு ஆன்லைன்முன்பதிவு நேற்று தொடங்கியது.