ஸ்ரீவில்லிபுத்துார், மார்ச் 20- ஸ்ரீவில்லிபுத்துார் பெரிய மாரியம்மன் கோயிலில் பூக்குழி திருவிழாவின் நிறைவு நாளான இன்று தேரோட்டம் சிறப்புடன் நடந்தது. இதனை முன்னிட்டு இன்று காலை தேருக்கு எழுந்தருளிய பெரிய மாரியம்மனுக்கு சிறப்பு பூஜைகள் நடந்தது. பின்னர் 12:35 மணிக்கு தேர் வடம் பிடித்து இழக்கும் நிகழ்ச்சி துவங்கியது. திரளான பக்தர்கள் ஓம் சக்தி, பராசக்தி கோஷத்துடன் வடம் பிடித்து தேரினை இழுத்தனர். ஒரு மணி நேரத்தில் கோயில் வீதிகளை சுற்றி வந்து, 12:41 மணிக்கு தேர் நிலையம் அடைந்தது. அப்போது பக்தர்கள் ஆராவாரம் செய்து அம்மனை தரிசனம் செய்தனர். ஏராளமான பக்தர்கள் மொட்டை போட்டும், மாவிளக்குகள் எடுத்தும் நேர்த்திக் கடன்களை செலுத்தி அம்மனை தரிசித்தனர். மாலை 5:30 மணிக்குமேல் யானை வாகனத்தில் அம்பாள் எழுந்தருளலும், மஞ்சள் நீராட்டும் நடந்தது. விழா ஏற்பாடுகளை தக்கார் சக்கரையம்மாள், செயல் அலுவலர் ஜோதிலட்சுமி, அறநிலையத்துறை அலுவலர்கள் செய்திருந்தனர். டி.எஸ். பி. பாலசுந்தரம் தலைமையில் ஏராளமான போலீசார் பாதுகாப்பு பணியில் ஈடுபட்டனர்.